Nga Skënder Minxhozi
Konferenca e shtypit e dy kryeministrave, e cila në precedentin e saj të fundit në Beograd, nëntorin e shkuar, kishte prodhuar uraganin diplomatik mes dy vendeve, mesa duket u mbyll pa “provokacija”. As Vuçiç nuk i ktheu Ramës “kusurin”, duke përmendur frazën “Kosova është Serbi”, e as Rama nuk tha diçka të kundërt. Konferenca duket se rrodhi në shina normale, dhe të dy palët u munduan të nënvizojnë afrimin, shanset për marrëdhënie ekonomike, vullnetin për stabilitet në rajon dhe konstatimin se për Kosovën qëndrimet janë të kundërt “sa një mal i lartë”.
Vuçiç u duk mjaft i qetë gjatë konferencës së shtypit dhe nuk reagoi kur Rama gjeti mënyrën që të përmendë togëfjalëshin “Kosovë e pavarur”. Citimi nga Rama i precedentit franko-gjerman, për ta krahasuar me marrëdhëniet shqiptaro-serbe, reflekton rëndësinë që ai dhe Vuçiç i kushtojnë vizitës së sotme, por edhe peshës që marrëdhëniet mes serbëve dhe shqiptarëve kanë në rajonin e Ballkanit. Kryeministri serb u fokusua në mënyrë preferenciale tek marrëdhëniet ekonomike, projektet në infrastrukturë dhe shkëmbimet tregëtare, e kjo duket se u bë me qëllim që vizita e tij e parë në Tiranë, për të cilët tha se “ndjehet krenar”, t’i ngjajë sa më shumë një kontakti normal mes dy fqinjësh.
