Katër shqiptarë kanë dalë para Gjykatës në Itali, pasi dyshohet se janë pjesë e një organizate kriminale në Itali, të akuzuar për trafik ndërkombëtar kokaine. Prokuroria italiane ka kërkuar 169 vite burg për 17 të pandehurit, pjesë e bandës, të cilët kanë kërkuar gjykim të shkurtuar. Ndërsa për 38-vjeçarin shqiptar Dritan Pane, akuza ka kërkuar dënimin me 9 vite burgim.
Organizata ndërkombëtare e trafikut të drogës, e cila përbëhej me venezuelianë, kolumbianë, shqiptarë dhe italianë, u shkatërrua në korrik të 2015, në kuadër të operacionit të koduar “Overing”, ku u arrestuan më shumë se 40 persona.
Sipas mediave italiane, gjatë operacioneve u sekuestruan mbi 600 kg kokainë, ndërsa një “rafineri” për përpunimin e kokainës ishte ndërtuar në Vibo Valentia.
Ndërkaq, janë edhe 3 shqiptarë të tjerë pjesë e bandës, të cilët do të gjykohen me procedurë të zakonshme nga Gjykata në Vibo Valentia. Ata janë shtetasit: Riza Baco, 38 vjeç, Aldo Gorgaj, 38 vjeç, Elton Zotaj, 36 vjeç.
Mediat italiane raportojnë se grupi i shqiptarëve angazhohej kryesisht në pikat ku merrej droga që administrohej nga kjo organizatë, e cila me pas vepronte në territore brenda dhe jashtë Italisë./bw/a.k