Opozita kosovare i është drejtuar sot godinës së qeverisë për të protestuar për arrestimin e deputetes së AAK-së Donika Kapaj Bujupi.
Protestuesit kanë hedhur shishe me ngjyrë në drejtim të ndërtesës së qeverisë, ndërkohë janë thyer disa xhama të kësaj ndërtese.
Deputetë të Lëvizjes Vetëvendosje të kryesuar nga kryetari Visar Ymeri dhe dhjetëra aktivistë janë nisur në drejtim të godinës së qeverisë kosovare.
Deputetëve dhe aktivistëve të Lëvizjes Vetëvendosje i janë bashkangjitur edhe ata të AAK-së, të cilët po kërkojnë lirimin e deputetes Donika Kadaj – Bujupi dhe ndaljen e ndjekjes së deputetëve të tjerë.
Kryesia e AAK-së, në një mbledhje të mbajtur vlerësoi se arrestimi i deputetes Donika Kadaj-Bujupi, është një arrestim politik dhe si i tillë duhet të përfundojë menjëherë. AAK e konsideron krejt të panevojshëm ndalimin dhe arrestimin e deputetes, dhe u kërkon organeve të drejtësisë që të mos zbatojnë urdhrat e politikës, dhe ta lënë deputeten të lirë.
Protestës së AAK-së dhe Vetëvendosjes iu bashkua edhe lideri i Nismës Fatmir Limaj.
Deputetja e Alenacës për Ardhmërinë e Kosovës, Donika Kadaj Bujupi është arrestuar sot në orët e para të mëngjesit.
