Në media sështë raportuar se Aleksandar Jabllanoviçi është zgjedhur kryetar i Listës Serbe dhe se ai tashmë ka kryer të gjitha procedurat legale në Komisionin Qendror të Zgjedhjeve.
E zgjedhja e Jabllanoviçit si kryetar i Listës Serbe, po konsiderohet si paradoks dhe shenjë e normalizimit të raporteve në mes Kosovës dhe Serbisë.
Ndërkaq për mundësinë e rikthimit të tij në institucionet e Kosovës, opozita thotë se një gjë e tillë nuk është e mundur.
Në Lëvizjen Vetëvendosje i kanë thënë Telegrafit se zgjedhja e Jabllanoviqit në krye të Listës Serbe e vërteton edhe njëherë qëllimin e këtij subjekti dhe qasjen që ata e kanë karshi, jo vetëm Kosovës si shtet, por edhe historisë së afërt të saj.
“Ata qartas po tregojnë se në krye të partisë e duan dikë që është shkarkuar nga posti ekzekutiv për fyerje ndaj nënave të Gjakovës, dikë që e ka shprehur sheshazi dhe në mënyrën më brutale urrejtjen ndaj shqiptarëve”, ka thënë për Telegrafin, deputetja Shqipe Pantina.
Pantina ka theksuar se fatkeqësia më e madhe këtu është prezenca e Listës Serbe në institucione, duke ditur qëndrimet e saj dhe luftën që i bën shtetit te Kosovës.
“Pra, terreni që i është dhënë është më shqetësues sesa kush e udhëheq atë, sepse me këdo në krye, ata kanë qëllime kundër shtetit të Kosovës”, tha Pantina.
Kurse shefi i Grupit Parlamentar të AAK-së, Pal Lekaj, ka thënë për Telegrafin se Aleksandar Jabllanoviç nuk ka të drejtë të jetë pjesë e institucioneve.
“Organizimi i brendshëm i partive politike apo i listave e i lëvizjeve është çështje e brendshme të tyre se si dhe kënd e vendosin në krye të tyre apo struktura. Nëse janë persona me precedentë penalë duhet të merret drejtësia me ta. Personi në fjalë të cilin ju po e potenconi nuk ka të drejtë që të jetë pjesë e institucioneve”, tha Lekaj për Telegrafin, duke shtuar më tej se partnerët e kësaj liste në qeverisje duhet ta rishqyrtojnë pozicionin e kësaj liste në qeveri edhe deri në prishje të koalicionit me ta.
“Një Listë Serbe edhe ashtu shumë destruktive në raport me institucionet e Kosovës, tani edhe me Jabllanoviqin në krye të saj do të jetë edhe më e vështirë për tu mirëkuptuar me ta”, u shpreh Lekaj. (b.an)
