11:32/ Nis votimi i projektligjeve. Teksa opozita mbajti të bllokuar foltoren e Kuvendit, deputetët e dy kampeve nuk pranuan të marrin fjalën nga vendi.
Në fund, votimi i projektligjieve u bë pa diskutime.
Në votim morën pjesë vetëm deutetët e mazhorancës.
11:20/ Teksa opozita vijon të mbajë të bllokuar foltoren, deputeti Klevis Balliu ka hedhur drejt kryeministrit Rama shishe uji, letra dhe sende të tjera.
Në këtë moment ai ndërpreu seancën për të 5-tën herë. Pas rinisjes u përjashtua edhe deuteti Balliu.
***
11:00/ Pas rinisjes së seancës kryetari i Kuvendit u ka dhënë fjalën deputetëve nga vendi, pasi ligjvënësit e opozitës vijojnë të mbajnë të bllokuar foltoren.
Pas fjalimit të deputetit Erjo Braçe, radha ishte e ish-kryeministrit Berisha i cili nuk pranoi të marrë fjalën.
Në këto momente, deputeti i PD Flamur Noka i është drejtuar vendit ku qëndron Rama dhe ka hedhur miell drejt kryeministrit.
Kreu i Kuvendit vendosi ndërprerjen e seancës. Ndërkohë u vendos përjashtimi i Flamur Nokës nga punimet e Kuvendit.
Kryetari i Kuvendit, Gramoz Ruçi ka përjashtuar nga punimet e seancës edhe deputetin tjetër të PD, Ervin Salianji, pas Flamur Nokës.
“Ervin Salianji për përdorimin e mjeteve të palejueshme ndaj drejtuesit të seancës përjashtohet nga seanca Parlamentare. Ervin Salianji dhe Flamur Noka lironi sallën. Shërbimet e Kuvendit t’u komunikojnë deputetëve daljen e tyre nga salla. Ndërpritet seanca”, tha Ruçi.
***
10:31/ Opozita ka vënë në zbatim skenarin e bllokimit të parlamentit. Pas fjalës së mbajtur nga kryetari i PD Lulzim Basha, deputetët e opozitës pushtuan foltoren duke kërkuar përjashtimin e kryeministrit Edi Rama nga seancat plenare pasi sipas PD ai ka fyer shqiptarët në fjalimin që ka mbajtur në parlament seancën e fundit.
“Duke nisur nga dita e sotme, duke nisur nga kjo sallë, që nuk mund të vazhdojë ky parlament pa nxjerrë nga salla njeriun që fyeu popullin. Ndaj le të përjashtohet ky (Rama) e të vazhdojë seanca normalisht. Nuk ka procedim normal seance pa larguar njeriun që ka fyer shqiptarët. Ai do mbajë përgjegjësi para ligjit”, deklaroi Basha.
Kryetari i Kuvendit i kujtoi Bashës se kjo është shkelje e rregullores. Ai vendosi ndërprerjen e seancës për normalizimin e situatës.
***
Më herët Kryetari i Partisë Demokratike Lulzim Basha ka kërkuar lirimin e 11 kuksianëve që mbetën në qeli pas protestës së dhunshme në kalimash. Nga foltorja e parlamentit, Basha tha se kjo mazhorancë nuk e ka problm të lirojë kriminelët për të mbajtur në burg njerëzit e pafajshëm që protestojnë për dinjitet dhe bukën e gojës.
“Sot është dita e 13 që 11 kuksianët mbahen në burg. 11 njerëz të varfër, të shpërfillur, të rrëmbyer nga policia dhe prokuroia politike Rama-Marku janë në burg.
Ky kryeminisër që vrasësit e përdhunuesit i bëri deputetë, kryebashkiakë e deputetë. Ky parlament që mbron me zell trafikantin e drogës, i do në qeli 11 kuksianët e pafajshëm. Ky kryeministër dhe ky ministër, vëllezërit e të cilëve janë trafikantë droge, i duan në burg baballarët dhe vëllezërit, në familjet e thjeshta shqiptare. 11 kuksianët e burgosur, janë fundi dhe turpi i këtij parlamenti që ka treguar se nuk ka prolem as vrasësit, as përdhunuesit, por nuk toleron ata që ngrenë zërin për të drejta e dinjitet”, deklaroi Basha.
E teksa lideri i opozitës mbante fjalimin, deputetët e tjerë të opozitës mbanin në dorë pankarta ku shkruanin “Liro kuksianët”./a.m.
