Në operacionin për arrestimin e Kelmend Balilit përfshihen dhe strukturat e shërbimit informativ kombëtar.
Burime për Report TV nga SHISH deklaruan se prej 2 ditësh informatorët në të gjithë vendin janë porositur për të grumbulluar të dhëna për lëvizje të mundshme të Balilit apo personat me të cilët ai mban kontakt.
Nga raportet e dorëzuara deri më tani nga shërbimet inteligjente rezulton se Balili nuk është pikasur në asnjë moment të ketë lëvizur duke u ekspozuar në ambiente publike por dyshohet se ai strehohet në Tiranë.
Të njëjta burime sqaruan se në disa hotele të ndryshme të kryeqytetit janë kryer kontrolle blic si dhe janë dislokuar agjent vëzhgimi.
Zyrtarisht nga muaji maj 2016 Kelmend Balili rezulton se nuk ka dalë jashtë vendit ligjërisht ndërsa gjatë kësaj periudhe ka pasur informacione se ai ka kaluar dhe nëpërmjet kufirit të gjelbër ilegalisht drejt Greqisë e Maqedonisë.
Ndërkohë zyrtarë të lartë të policisë së shtetit të cilët po koordinojnë operacionin për arrestimin e Balilit pranuan se deri në këto momente të gjitha kontrollet kanë rezultuar të pasuksesshme dhe kartela me të dhënat e Balilit si person në kërkim i janë vënë në dispozicion dhe policive fqinje si Kosovë, Mal i Zi dhe Maqedoni.
Kur kanë kaluar katër ditë nga urdhër arresti i prokurorisë shqiptare për Balilin dhe ky urdhër nuk është ekzekutuar ka reaguar dhe ambasadori i SHBA-ve Donald Lu duke e cilësuar mosarrestimin e Balilit si një dështim të Policisë, Prokurorisë dhe Drejtësisë shqiptare. /a.m.
