Ministria e Mbrojtjes e Izraelit raportoi se një dërgesë e madhe me pajisje inxhinierike ushtarake mbërriti të mërkurën nga Shtetet e Bashkuara – duke përfshirë dhjetëra buldozerë D9 dhe pajisje shtesë, të cilat ishin ngrirë nën administratën e ish-presidentit amerikan Joe Biden.
Dërgesa u prit në Portin e Haifës dhe pajisjet u ngarkuan në dhjetëra kamionë transporti të operuar nga Njësia e Transportit Emun e IDF-së dhe Drejtoria e Teknologjisë dhe Logjistikës, të cilat më pas i transferuan ato. Vendimi për të hequr bllokimin u mor në fund të janarit, vetëm disa ditë pasi Donald Trump hyri në Shtëpinë e Bardhë.
Operacioni i transferimit u drejtua nga drejtori i Ministrisë së Mbrojtjes dhe ish-zëvendës Shefi i Shtabit të IDF-së, Gjeneral Major Amir Baram.
Ministria e Mbrojtjes shtoi se, deri tani, mbi 100,000 ton pajisje ushtarake kanë mbërritur në Izrael nëpërmjet 870 fluturimeve dhe 144 dërgesave detare.
“Ky është operacioni më i madh logjistik ajror dhe detar në historinë e Shtetit të Izraelit”, tha një zyrtar.
Në nëntor, drejt fundit të mandatit të Biden, zyrtarët e sigurisë i konfirmuan Ynet se administrata amerikane kishte ngrirë një dërgesë prej 134 buldozerësh Caterpillar D9, mes protestave në rritje në SHBA – si në publik ashtu edhe brenda lidershipit – për përdorimin e tyre në shembjen e shtëpive në Rripin e Gazës.
