Një tjetër rast i mashtrimit ndërkombëtar nëpërmjet bursave fiktive është goditur nga Policia e Shtetit në Tiranë, në kuadër të operacionit të koduar Fasada.
Aksioni u zhvillua nga Sektori për Hetimin e Krimit Ekonomik dhe Financiar në DVP Tiranë, pas informacioneve të siguruara, duke çuar në zbulimin e një apartamenti të kthyer në call center në rrugën “Sulejman Delvina”.
Gjatë ndërhyrjes, policia ka kapur në flagrancë dy administratorët e ambientit, të cilët u arrestuan.
Sipas njoftimit zyrtar, ata kishin marrë me qira apartamentin dhe e përdornin për të zhvilluar aktivitet të paligjshëm, duke mashtruar shtetas të huaj për të investuar në platforma fiktive.
Ndërkohë, 12 persona të tjerë, që punonin si operatorë në këtë call center, janë proceduar penalisht në gjendje të lirë.
Gjatë operacionit janë sekuestruar 19 njësi kompjuterike, 2 aparate celularë dhe 1 DVR, që dyshohet se përdoreshin për realizimin e mashtrimeve.
NJOFTIMI:
Specialistët e Sektorit për Hetimin e Krimeve Ekonomike dhe Financiare të DVP Tiranë, pas informacioneve të siguruara së fundmi, kanë organizuar dhe finalizuar me sukses operacionin policor të koduar “Fasada”.
Gjatë operacionit, shërbimet e Policisë kanë ndërhyrë në apartamentin në rrugën “Sulejman Delvina”, i cili ishte përshtatur si call center, ku kanë kapur në flagrancë shtetasit A. R. dhe L. M., si dhe 12 operatorë, të cilët mashtronin shtetas të huaj për të investuar në bursa fiktive.
Nga hetimet rezultoi se apartamenti ishte marrë me qira nga shtetasi A. R., i cili, në bashkëpunim me shtetasin L. M., e administronte këtë ambient me qëllim zhvillimin e kësaj veprimtarie të kundërligjshme.
Në përfundim të veprimeve të para hetimore u vunë në pranga shtetasit A. R., 44 vjeç, dhe L. M., 26 vjeç, administratorë të ambientit.
Si dhe u proceduan penalisht 12 shtetas, operatorë, të cilët u kapën në flagrancë në apartament, gjatë ndërhyrjes nga Policia.
Në bashkëpunim me Prokurorinë vijojnë hetimet për dokumentimin e plotë ligjor të kësaj veprimtarie të paligjshme.
Materialet procedurale i kaluan Prokurorisë, për veprime të mëtejshme.
Policia e Shtetit mbetet e vendosur për të goditur çdo formë të kriminalitetit, në bashkëpunim me agjencitë ligjzbatuese, si dhe për të mbrojtur qytetarët, brenda dhe jashtë vendit.
