Si rrallëherë, spitali pediatrik dhe mjekët e familjes po përballen më një fluks të pazakontë fëmijësh.
“Omicron” nuk po kursen të vegjlit, duke infektuar të pavaksinuar, të vaksinuar, si dhe persona që e kanë kaluar njëherë sëmundjen.
Këtë e thonë mjekët e Institutit të Shëndetit Publik dhe mjekët e familjes, të cilët vënë në dukje se ditët e fundit po përballen me fluks të shtuar fëmijësh me simptoma të COVID-19 dhe që zakonisht e kalojnë lehtë.
Pjesa më e madhe e të sëmurëve që i drejtohen qendrave shëndetësore me shenja të gripit rezultojnë pozitiv me koronavirus.
Më konkretisht, një në 2-3 fëmijë të sëmurë që i drejtohen mjekut këto ditë dalin pozitiv me koronavirus. Për të ulur fluksin e lartë të urgjencave në pediatrinë e QSUT-së, 4 qendra shëndetësore në Tiranë janë kthyer në shërbim 24 orësh për të pacientet e vegjël.
Varianti “Omicron” po bëhet gjithnjë e më dominues ndaj “Delta”-s dhe virozëve të stinës. Për fat të mirë, fëmijët dhe të vaksinuarit thonë mjekët po e kalojnë si grip.
Por edhe shifrat e shtrimeve në spital nuk kanë ndryshuar pavarësisht valës së variantit “Omicron”.
Aktualisht, në spital janë afro dhjetë fëmijë që po marrin trajtim si pasojë e infektimit me koronavirus.
g.kosovari
