Komiteti Teknik i Ekspertëve ka vendosur të mos ndryshojë masat anti-Covid. Kryetarja e Komitetit, Mira Rakacolli u shpreh se ora policore nuk do të ndryshojë, me përjashtim të natës së ndërrimit të viteve.
Ajo i bëri thirrje qytetarëve që të respektojnë masat, por edhe të vaksinohen. Ndërkohë që kujtoi edhe njëherë se nga 4 janari, punonjësit e administratës, qendrave tregtare duhet të paraqesin certifikatën e Vaksinimit.
“Do të mbetën në fuqi të njëjtat masa që kemi edhe sot. Por prania e virusit Omicron bën të domosdoshme respektimin e këtyre masave, që jemi të ndërgjegjshme që nuk po zbatohet.
Studiuesit po bëjnë thirrje për vaksinim. Me kalimin e kohës infektohen të pavaksinuarit dhe format e rënda janë tek të pavaksinuarit.
Vaksinimi nuk është një zgjedhje personale, por përgjegjësie publike.
Jemi në prag të festave dhe vitin e kaluar solli rritje të rasteve.
Duhet të jemi të përgjegjshëm për ata që do festojnë, të evidentojnë grumbullimet dhe të mbajnë maska.
Ora policore do të jetë e njëjta 23:00, me përjashtim të natës së ndërrimit të viteve.
Në 4 janar, punonjësit e administratës, qendrave tregtare duhet të paraqesin certifikatën e Vaksinimit.”, tha Rakacolli.
Masat kufizuese që janë në fuqi aktualisht
- Ora policore vijon me orën 23:00 – 06:00.
- Vijon që qytetarët që hyjnë në Republikën e Shqipërisë, nga të gjitha pikat kufitare apo ata që kalojnë tranzit, duhet të vijojnë të dorëzojnë një nga dokumentet e mëposhtme:
- Pasaportë vaksinimi, ku data e vaksinës së fundit të ketë të paktën dy javë e aplikuar nga data e hyrjes në kufi.
- Test PCR, të kryer brenda 72 orëve ose testin e shpejtë antigenic brenda 48 orëve të hyrjes në kufi.
- Provë të kalimit të infeksionit Sars-Cov-2 të vlefshme deri në 6 muaj pas shërimit.
- Përjashtim nga rregullat e përcaktuara në pikën 2, bëhet për fëmijët deri në moshën 6 vjeç.
- Qytetarët rezidentë të Republikës së Shqipërisë dhe që nuk kanë asnjë nga dokumentet e përmendura në pikën 1, duhet të vetë izolohen për një periudhë 10 ditore dhe të informojnë autoritetet shëndetësore për të kryer një test në fund të periudhës së izolimit.
- Vijon që në strukturën e aeroporteve do të lejohen të hyjnë vetëm pasagjerët që udhëtojnë, të cilët duhet të zbatojnë me rigorozitet mbajtjen e maskës ashtu sic është rekomanduar sipas protokollit të ndryshuar.
- Vijon të mbetet në fuqi që në të gjithë institucionet shëndetësore, moslejimi i hyrjes së familjarëve për personat që janë të shtruar.
- Vijon të mbetet në fuqi urdhri për përdorimin e maskave në ambiente të mbyllura, në qendra tregtare, supermarkete, dyqane etj, e në të gjithë ato vende ku nuk sigurohet distancimi fizik.
- Vijon të mbetet në fuqi urdhri për lejimin e grumbullimeve deri në 50 persona dhe të aktiviteteve kulturore, sportive etj deri në 30% të kapaciteteve të tyre me prezencë të spektatorëve.
g.kosovari
