Fshati i Voskopojës edhe këtë fundjavë është vizituar nga një numër i lartë turistësh vendas dhe të huaj të cilët gjejnë në këtë vend turistik gërshetimin e vlerave të trashëgimisë kulturore, kulinarisë, traditës dhe bukurive natyrore.
Ata që vijnë për herë të parë, veçanërisht pëlqejnë trashëgiminë histroike dhe njerëzit e kësaj krahine.
TURISTE
“Jam njohur me historinë interesante të fshatit të Voskopojës që dikur ka qënë një qëndër e qytetërimit mesjetar dhe ka patur më shumë banorë se sa Selaniku sot. Prandaj kisha interes që të vija dh eta zbuloja nga afër.”
“Është vend shumë i bukur, natyra fantastike, njerëzit shumë të sjellshëm, po kënaqem.”
“Unë vij nga Letonia por jetoj në Korçë dhe e vizitoj shpesh Voskopojën, është një mrekulli.”
Bashkia e Korçës dhe operatorët turistikë kanë organizuar një aktivitet dy ditor me temë “Zbulo Voskopojën”. Pjesë e festës është bërë edhe maratona e cila organizohet për të 6-tin vit radhazi dhe nuk i munguan as fëmijët. Pjesë e garës së vrapimit u bënë edhe turistët e huaj.
“Vij nga Gjermania, po kënaqemi shumë këtu, është hera e parë që vijmë në Shqipëri. Në Voskopojë natyra është e mrekullueshme, ndërsa njerëzit shumë mikpritës”
“Ne erdhëm dje për herë të parë në Shqipëri sepse dëgjuam për maratonën e vrapit këtu në Voskopojë. Me pëlqen shume qe këtu ka njerëz nga vende të ndryshme të botës, dhe mikpritja është fantastike”.
Vizitorët duket se kanë shumë interes të njohin historinë e këtij vendi.
ANTON FALO
OPERATOR TURISTIK
“Voskopoja është një fshat 700 vjeçar me 7 kisha ekzistuese, një manastir, akademi të lartë ka patur, shypshkronjë.”
Sipas shifrave zyrtare, vetëm gjatë 3 muajve të verës, më shumë se 50 mije turistë, kanë vizituar Voskopojën.
