Nga Armando Meta
Në kushtet kur Parlamenti është i shpërndarë, praktikisht nuk ka më asnjë shans, qoftë për të votuar Vetting-un apo edhe për të bërë emërime ministrash. Në këto rrethana duket qartazi se oferta e Ramës për Bashën për përfaqësim në rang zv/kryeministri dhe zv/ministrash për të monitoruar procesin e zgjedhjeve është jo vetëm ‘bujare” si gjest politik, por edhe e kopsitur në planin legjislativ.
Në bazë të Kushtetutës, votimin e së cilës PD e ka bojkotuar në vitin 1998, parlamenti i shpërndarë rithirret apo i zgjatet mandati vetëm në rastin e një gjendje lufte.
Në nenin 66 të Kushtetutës thuhet saktësisht se “Mandati i Kuvendit zgjatet vetëm në rast lufte dhe për sa kohë zgjat ajo. Kur Kuvendi është i shpërndarë ai rithirret vetëvetiu”.
Pra kuptohet se Kuvendi nuk mund të rithirret në asnjë rrethanë tjetër. Në këtë mënyrë edhe legjislativisht nuk ka asnjë hapësirë ligjore për të thirrur Kuvendin për miratuar ‘ministra teknik’ apo çfarëdo qoftë. Në bazë të Kushtetutës është kryeministri që çon emrat e ministrave tek Presidenti për dekretim dhe më pas dekretet kalojnë për votim në Kuvend. Në rrethanat aktuale, kur parlamenti është i shpërndarë, nuk ka asnjë parashkrim ligjor që Kuvendi thirret për të miratuar dekretet për ministrat. Pavarësisht rëndësisë, Kuvendi nuk mund të thirret edhe për Vetting-un.
Në këto kushte oferta e Ramës për zv/ministra, emërimi të cilëve nuk ka nevojë për dekret të Presidentit e as votim në Kuvend, duket oportune, pavarësisht se nuk plotëson kushtet e PD-së. Gjithshka mund të kthehet kokëposhtë vetëm nëse duan ta bëjnë “leckë” Kushtetutën. Shqipëria nuk është në gjendje lufte dhe as në ndonjë situatë të jashtëzakonshme. Është thjeshtë në një situatë ku një forcë politike ka humbur busullën dhe kërkon personalisht të dalë nga sistemi politik duke bojkotuar zgjedhjet. /javanews.al
