“Odisea”, filmi me regji të Christopher Nolan, është kthyer në një dukuri kulturore në Greqi. Përveç suksesit në kinema, produksioni ka nxitur diskutime të shumta mbi mënyrën se si epopeja e Homerit është përshtatur për ekranin e madh.
Të dhënat e një sondazhi të ri nga Kapa Research tregojnë se rreth 90% e grekëve kanë dëgjuar ose kanë njohuri për filmin, ndërsa 48% deklarojnë se janë përfshirë tashmë në biseda dhe debate rreth tij.
Në rritjen e interesit të publikut ka ndikuar ndjeshëm edhe emri i regjisorit britanik. Christopher Nolan gëzon një popullaritet prej 64% në publikun e përgjithshëm, shifër që arrin në 90% mes personave që e kanë ndjekur filmin në kinema.
Nga të anketuarit që e kanë parë “Odisean”, 71% shprehen shumë ose mjaft pozitivisht për të. Përkrah vlerësimit të lartë të filmit, shumica dërrmuese mendon se ky produksion do të kontribuojë edhe në promovimin e Greqisë në arenën ndërkombëtare.
Elementi më i vlerësuar i filmit janë efektet vizuale, të cilat kanë marrë 86% reagime pozitive. Interpretimet e Matt Damon dhe Anne Hathaway janë pëlqyer nga 85% e publikut, ndërsa regjia ka siguruar 81% vlerësime pozitive. Më shumë rezerva ka pasur për përshtatjen e vetë eposit homerik, e cila është vlerësuar pozitivisht vetëm nga 48% e të pyeturve.
Ndikimi i mundshëm në imazhin dhe sektorin turistik të Greqisë përbën një tjetër gjetje të rëndësishme të sondazhit. Mes atyre që e kanë parë filmin, 79% besojnë se ai shërben si një promovim i rëndësishëm i vendit përtej kufijve, kurse 75% presin që të ndikojë në rritjen e turizmit.
Filmi shihet gjithashtu si një urë mes brezave të rinj dhe letërsisë së lashtë greke, një efekt që mbështetet nga 72% e të anketuarve. “Odisea” ka rikthyer veprën e Homerit edhe në bisedat familjare: 36% thonë se kanë diskutuar me familjarët për të pas shikimit të filmit, ndërsa 31% kanë krahasuar produksionin me tekstet origjinale.
Zgjedhja e Lupita Nyong’o për të interpretuar Helenën e Trojës është një prej temave që ka prodhuar më shumë debat. Në publikun e përgjithshëm, opinionet ndahen në mënyrë të barabartë: 46% e konsiderojnë këtë përzgjedhje pozitive ose neutrale, ndërsa po 46% kanë një qëndrim negativ.
Qasja ndaj kësaj zgjedhjeje ndryshon mes personave që e kanë parë filmin, ku niveli i pranimit ngjitet në 62%. Në të njëjtën kohë, sondazhi zbulon se 57% e pjesëmarrësve janë të hapur ndaj trajtimeve më të lira të historisë dhe mitologjisë së lashtë.
Megjithatë, nuk ka një qëndrim të qartë kur bëhet fjalë për raportin mes krijimtarisë artistike dhe respektimit të materialit burimor. Lirinë e autorit e mbështesin 40% e të pyeturve, ndërsa 39% kërkojnë që përshtatja t’i qëndrojë më besnike veprës së Homerit.
Kapa Research e realizoi sondazhin në periudhën nga 31 korriku deri më 2 gusht 2026. Në të morën pjesë 1.575 persona nga 13 rajonet e Greqisë, përfshirë 238 të anketuar që e kishin parë filmin.
