ODIHR i ka sjellë opinionin urgjent të kërkuar nga Komisioni i Posaçëm i reformës zgjedhore për sa i përket p/ligjit për financimin e partive politike, raport i cili është siguruar nga gazetarja e A2CNN Fjorela Beleshi. Në këto rekomandime ODIHR kërkon më shumë transparencë, kontroll dhe mekanizma kundër shmangies së rregullave.
“Boshllëqet rregullatore në fusha si huatë, financimi nga palë të treta dhe zbatimi, mund të minojnë koherencën dhe efektivitetin e përgjithshëm të sistemit dhe mund të krijojnë hapësira për abuzim. Në këtë aspekt, është e rëndësishme të sigurohet që Projektligji të jetë plotësisht në përputhje me kuadrin ekzistues ligjor që rregullon financimin politik”, thuhet në raport.
Rekomandimet kryesore të ODIHR
Transparenca e Donatorëve: Të ndalohen rreptësisht donacionet në emër të personave të tjerë dhe të publikohet profesioni, punëdhënësi dhe pronësia përfituese e kompanive financuese.
Rregullimi i Huave: Të qartësohen rregullat për huatë, shlyerjen e tyre dhe faljen e borxheve, për të shmangur financimet e fshehura.
Sanksione Proporcionale: Gjobat për donacionet e tepërta duhet të jenë shumëfish i shumës tejkaluese dhe të mbulojnë çdo shkelje të mundshme.
Kapacitetet e KQZ-së: Suksesi i reformës do të varet tërësisht nga burimet financiare, njerëzore dhe hetimore që do t’i vihen në dispozicion Komisionit Qendror të Zgjedhjeve.
