1.5 milionë euro për pyllëzimin do të jepen përmes grantit të dytë të Shërbimeve Mjedisore, aplikimet për të cilin do të celen gjatë muajit korrik.
Ministri i Turizmit dhe Mjedisit Blendi Klosi theksoi se projekti shkon në përputhje me politikat e Ministrisë së Mjedisit, për forcimin e pyjeve në vendin tonë duke kontribuar në realizimin e objektivit për mbjelljen e 20 milionë e 200 mijë pemë deri në vitin 2020.
Pyjet janë një potencial i madh ekonomik dhe planet e pyllëzimit duhet të shihen në fuksion të komunitetit.- tha kreu I Turizmit dhe Mjedisit i cili shtoi gjithashtu se me mbështetjen e Bankës Botërore, do të realizohet edhe inventarizimi i pyjeve për të shkuar më tej edhe në një projekt tjetër për sistemin e numërimit të pemëve.
Ministri Klosi tha se ka ardhur koha e politikave më të forta për menaxhimin e pyjeve, për edukimin mjedisor që nga bankat e shkollave me krijimin e kurorave të gjelbra në cdo shkollë, duke kaluar te bizneset, te të gjithë ata që ndotin mjedisin dhe që duhet të mbjellin pemë në bashkëpunim me bashkitë.
Nga ana e tij, ministri Peleshi theksoi rëndësinë e këtij granti të dytë për shërbimet mjedisore duke theksuar se mjedisi dhe bujqësia kanë shumë pika takimi dhe se projekte të tilla janë mundësi mjaft të mira për fermerët.
Në aktivitetin informues për thirrjen e dytë të aplikimeve për Shërbimet Mjedisore , të zhvilluar në Universitetin Bujqësor, ishte e pranishme edhe Drejtore e Bankës Botërore në Shqipëri, Znj. Maryam Salim, Drejtore e përgjithshme e AZHBR, Znj. Frida Krifca.
Në dallim nga thirrja e parë, 70% e fondit prej 2.3 milionë euro do të shkojë në favor të pyllëzimit për të qenë në koherencë me vizionin e qeverisë shqiptare për të shtuar sipërfaqe të gjelbra dhe 30% e fondit për aktivitete si, do të jenë për masat parandaluese ndaj fenomeneve të erozionit, lera uji për bagëtinë, etj
Projekti është mbështetur financiarisht nga Banka Botërore dhe Qeveria Suedeze, zbatuar nga Agjencia për Zhvillim Bujqësor dhe Rural (AZHBR) nën drejtimin e Ministrisë së Turizmit dhe Mjedisit dhe Ministrisë së Bujqësisë dhe Zhvillimit Rural.
a.ç
