Shtëpia e Bardhë ka konfirmuar se takimi i Presidentit Donald Trump me Këshillin e Sigurisë Kombëtare, i zhvilluar në dhomën e situatave të emergjencës, ka përfunduar.
Takimi zgjati 1 orë e 20 minuta. Presidenti Trump nuk dha ndonjë deklaratë pas përfundimit të diskutimeve.
Sipas burimeve të cituara nga CBS, partner mediatik i BBC në SHBA, Trump është duke shqyrtuar seriozisht mundësinë që Shtetet e Bashkuara t’i bashkohen Izraelit në sulmet ndaj objekteve bërthamore të Iranit, përfshirë edhe objektin në Fordow.
Të njëjtat burime theksojnë se kjo çështje pritej të diskutohej gjatë takimit të sotëm në Shtëpinë e Bardhë, megjithatë brenda ekipit të ngushtë të këshilltarëve të Trump ende nuk ka një dakordësi të plotë për një ndërhyrje të tillë.
Situata mbetet e tensionuar, ndërsa vendimet që priten nga Uashingtoni mund të kenë ndikim të drejtpërdrejtë në përshkallëzimin e mëtejshëm të konfliktit në Lindjen e Mesme.
