Policia e Shtetit dhe Prokuroria për Krime të Rënda finalizuan një super-operacion në kuadër të të cilit u shkatërrua një prej bandave më të rrezikshme në vend, e cila operonte edhe në shtete të ndryshme evropiane në trafikun e drogës dhe veprimtari të tjera.
Të paktën 11 persona, pjesëtarë të bandës “Bajri” në Shkodër u arrestuan. Disa prej tyre u prangosën në Holandë dhe të tjerë në Shkodër dhe Tiranë.
Operacioni u finalizua në bashkëpunim dhe në kontakt në kohë reale me autoritetet partnere.
Pas aksionit, ka ardhur edhe reagimi nga ana e ambasadorit të Bashkimit Evropian në Shqipëri Luigi Soreca. Ai e ka vlerësuar mjaft të rëndësishëm finalizimin e aksionit që shkatërroi një prej bandave më të fuqishme.
“Përshëndes operacionin e rëndësishëm të zhvilluar në Shqipëri dhe Holandë nga Punët e Brendshme, task forca speciale në bashkëpunim me disa forca policie të BE-së. Lufta ndaj krimit të organizuar dhe trafikut të drogës është prioritet për Shqipërinë dhe BE-në”, shkruan ambasadori.
