“O majmun, o legen”, debatet jashtë mikrofonit në Parlament

Partia Demokratike ka bllokuar dje sërish punimet normale të Parlamentit, duke zaptuar foltoren dhe duke mos lejuar kolegët të flasin për rendin e ditës.

Edhe pse që në fillim të seancës, kreu i Kuvendit, Ilir Meta, njoftoi se deputetja Valentina Leskaj kishte firmosur një letër në të cilën kërkonte që mandati i saj të shkonte për interpretim në Gjykatën Kushtetuese, kjo nuk e ka “kënaqur” pakicën.

Debati në Kuvend është spostuar dhe për protestën e Parkut të Liqenit, ku deputeti Gent Strazimiri shkoi i armatosur. Gjatë seancës ra në sy mungesa e Strazimirit, çka u përdor nga deputetët e maxhorancës për të vijuar sulmet politike.

Tonet në Kuvend u acaruan kur deputetët e pakicës nuk lejuan as kreun e Grupit të PS-së, Gramoz Ruçi, të fliste në foltoren e Kuvendit. Ky i fundit, pas pushimit, u detyrua të fliste nga vendi.

“Opozita të zërë vendet dhe të dëgjojë mendimet e kundërshtarëve të tyre politikë dhe jo të uzurpojë foltoren e Parlamentit. Se flasin për puçe, s’ka puç më të madh se të mos lejosh fjalën e lirë në një Parlament demokratik”, tha dje Ruçi.

QËNDRIMI

Edi Paloka ka shprehur qëndrimin e Partisë Demokratike, duke thënë se nuk do të lejohen punimet normale për sa kohë që nuk zbatohet vendimi i Gjykatës Kushtetuese dhe miratimi i amendamenteve për ligjin e dekriminalizimit.

Paloka ka sulmuar Kryeministrin Rama, duke thënë se ai mban qëndrim lëpirësi me të huajt.

“Tashmë jemi mësuar me dy pamjet e Kryeministrit Rama, atë të lëpirësit me të huajt dhe të arrogantit me opozitën dhe qytetarët e thjeshtë. Ky është tipari kryesor i Ramës, siç është dhe paturpësia, përpara mashtrimit apo cinizmi sy më sy. Dje kërkoi të mashtrojë dhe komisionerin Hahn, duke i thënë se vendimin e Gjykatës Kushtetuese do ta dërgojë për interpretim te Gjykata Kushtetuese. Bëhet fjalë për vendimin e Gjykatës Kushtetuese, që vjen me kërkesë të opozitës për shqyrtimin e çështjes së konfliktit të interesit të dy deputetëve të maxhorancës. Komisioneri Hahn dje në fakt foli qartë dhe prerë për çështjet, e që sot janë në rend të ditës dhe në interes të shqiptarëve. ‘Zbatoni vendimet e Gjykatës Kushtetuese, zbatoni Ligjin e Dekriminalizimit, krijoni kushtet për zgjedhje të lira e të ndershme dhe kryeni reformën zgjedhore, dialog politik dhe konsensus për Reformën në Drejtësi’”, tha dje Paloka.

AKUZAT

Diskutimet në Parlament u shtuan kur Taulant Balla kërkoi nga demokratët të përjashtojnë deputetin Gent Strazimiri për armëmbajtje pa leje në tubime. Ai e ka quajtur deputetin e PD-së “Indiana Xhons”, i cili duhet të largohet nga Kuvendi. Balla ka kërkuar që Strazimiri të jepte sqarime se çfarë dorëzoi në komisariat, “armën pa leje apo këllëfin e Ristanit”.

Edi Paloka: Ne edhe sot do të jemi këtu në këmbë për të kundërshtuar që ky Parlament të zhvillojë punimet normalisht.

Xhemal Qefalia: Hapuni të flasë kryetari i grupit të PS.

Edi Paloka: Nuk ka për të fol njeri këtu…

Taulant Balla: Jo mo jo, se nuk e zë njeri foltoren me forcë.

Ilir Meta: Zoti Paloka, ju lutem, më tolerant.

Gramoz Ruçi: S’ka puç më të madh se të mos lejosh fjalën e lirë në një Parlament demokratik. Ju lutem shumë, kërkoj të vendosni situatën në vend.

Ilir Meta: 5 minuta pushim, shpresoj të ketë reflektim për kërkesën e zotit Ruçi, që është e drejta themelore për t’u shprehur të gjithë në mënyrë të barabartë.

Taulant Balla: Foltorja e Kuvendit është institucioni më i shenjtë në këtë vend.

Edi Paloka: Jo, jo, Kushtetuta është më e shenjta…

Edmond Spaho: Ju nuk duhet të bllokoni Kushtetutën.

Taulant Balla: Nuk ka askush të drejtë t’i bllokojë.

Edi Paloka: Ju shkelni Kushtetutën dhe keni gojë të ankoheni për foltoren e Parlamentit.

Taulant Balla: Ju e keni një hall që bllokoni foltoren, ku e keni Indiana Xhonsin? Ku e keni Strazimirin e famshëm?!

Bedri Hoxha: Ç’punë ke ti me Strazimirin, a ka vrarë njeri ai në këtë rast?!

Taulant Balla: Vetë deputeti i akuzuar për armëmbajtje paleje dhe mbajtje të armës në tubime publike ka për detyrë të informojë Kuvendin e Shqipërisë, çfarë dorëzoi dje?! Pistoletën apo këllëfin e Ristanit?!

Arben Ristani: O majmun, kujdes me fjalët o legen…

Taulant Balla: Si s’ju vjen një pikë turpi. Dilni dhe thoni që nuk ishte armë, por këllëf celulari. Nuk mund të krahasohet kurrsesi qiraja e një ambienti me armëmbajtjen pa leje të një deputeti. Në rastin më të parë që një deputet i yni u akuzua për armëmbajtje pa leje, Partia Socialiste e përjashtoi nga radhët e veta. Pse nuk e përjashtoni ju Gent Strazimirin?/Panorama