“O gjakprishur, shërbëtor i Iranit, hajde njëherë në Shqipëri”, Balla përplasje në distancë me historianin pas paralajmërimit për padi

Kreu i Grupit Parlamentar të Partisë Socialiste, Taulant Balla, ka replikuar në distancë me historianin Olsi Jazexhi, “i njohur për qëndrimet e tij publike antiamerikane, antizioniste dhe si fans i madh i Iranit”.

Reagimi i Ballës erdhi pasi Jazexhi kishte paralajmëruar padi për shpifje ndaj kreut të Grupit të PS, për shkak se ky i fundit e kishte akuzuar për lidhje me Iranin.

“Avokat për padi për Taulant Ballën. Kërkoj një avokat që do më ndihmojë (falas) për një padi për shpifje ndaj Taulant Ballës. Nëse dikush do të shohi qyfyre, e ftoj të më shkruaj sa më parë”, kishte shkruar Jazexhi në rrjetet sociale.

Duke e quajtur Jazexhiun si shërbëtor të shtetit iranian, Balla e ftoi atë që të vinte njëherë në Shqipëri dhe ishte gati që të përballej me të në gjyq, madje sipas kreut të Grupit të PS, edhe në Lagunën e Nartës. Me ironi Balla tha se nëse gjyqi do të bëhej në Lagunën e Nartës, do shihej qartë se me kë do të qeshnin flamingot.

Më tej duke iu drejtuar protestuesve, Balla tha se ‘gjakprishuri Jazexhi’ po tallet me ta duke iu thënë se ka rënë dakord me qeverinë iraniane që droni më i ri i regjimit të quhet Flamingo.

Reagimi i Ballës:

Përgjigje Sarvanit të Gardës Revolucionare dhe shërbimit sekret të Iranit, OLSI JAZEXHI:

Ti shërbëtor i shtetit terrorist të Iranit hajde njëherë në Shqipëri, pastaj e bëjmë gjyqin te laguna e Nartës po deshe dhe shohim se me kë qeshin edhe flamingot!

‘Edhe diçka për “patriotët” në shesh. Ky gjakprishuri tallet me ju se gjoja paska rënë dakord me qeverinë e Iranit që droni më i ri i regjimit iranian të quhet Flamingo. Hajde tallje me ju hajde.