Nga Artur Ajazi
E gjithë zhurma dhe zallamahia, duket se po bëhen për të shpëtuar “kryetarin e mirë” Lulzim Basha. Sapo mësoi lajmin e shumëpritur nga shqiptarët se “do të kemi lista të hapura” apo dhe se “rrezikohen koalicionet parazgjedhore”, në zyrën e Lulzimit sikur ra “bomba”. Të gjithë vunë kujën, të gjithë shqupistët, aleatët fallco, ndonjë zyrtar i (pa) informuar gjerman, madje dhe kreu i shtetit Meta,janë turrur të shpëtojnë…kryetarin e mirë Lulzim Basha. Frika e madhe nga listat e hapura ka mbërthyer edhe Ilir Metën, dhe nuk dihet pse, pasi ai nga pozicioni ku ndodhet, nuk ka përse të shqetësohet. Natyrisht, i dhëmb LSI-ja, i dhëmb humbja më e madhe që do të pësojë në zgjedhjet e 2021, partia e hipotekuar nga Meta dhe Monika.
O burra të shpëtojmë “kryetarin e mirë” Lulzim Basha, kjo është motoja e çdo takimi, nga dyert dhe shkallët e SHQUP-it, deri në shkallët e oborrin e Presidencës. Një “aleancë” hipokritësh, një takim aspak i nevojshëm i një kryetari partie, që para pak vitesh kërkonte nga Rama “lista të hapura”, dhe që sot flet profka, madje dhe paralajmëron se “do të ndizet flakë Tirana”. Por mbrapa nuk mbetet edhe kreu real i LSI-së (Ilir Meta), i cili në këto momente delikate, kur Edi Rama po u zhbën gjithë “çorbën” e gatuar herë në SHQUP, dhe herë në Presidencë, po hiqet sikur i “dhëmb” Kushtetuta. O burra të shpëtojmë “kryetarin e mirë” Lulzim Basha.
Ky mendim ka ngritur në këmbë gjithë shpupistët, sejmenët e kryetarit , ata që qysh para 1 viti e kanë marrë garancinë nga ai se “do të jenë në listat e reja”, si e vetmja punë nga ku paguhen qyl. Ata që dogjën mandatet dhe kredencialet me votuesit e tyre, ata që ikën si tinëzarë nga bashkitë, duke braksitur votuesit e tyre, dhe që sot tentojnë të “djegin” edhe marrëveshjen e 5 Qershorit. Askujt nuk i “dhëmb” Kushtetuta, askujt nuk i “dhëmb” marrëveshja apo më keq akoma “vota e lirë”, aq më tepër Lulzimit, por gjetkë është shinjestra.
Synohet të mbahen listat e mbyllura, synohet të mbahet kryetari i Partisë Demokratike edhe për 4 apo 8 vjet të tjera Lulzim Basha, synohet të gjendet një tjetër “pretekst” nesër kur të humbin zgjedhjet, për ti drejtuar gishtin nga kryeministri Rama. Askush nuk e beson se Meta po i “qan hallin” Lulzimit, pasi ata, as e kanë dashur, dhe as e duan njëri-tjetrin. E rëndësishme për Lulzimin dhe Ilirin, është marrja e pushtetit, krijimi i një situate
kaotike, njollosja në sytë dhe veshët e faktorit ndërkombëtar e qeverisjes, e kryeministrit Rama, duke e akuzuar atë si “kundërshtar i procesit të integrimit të Shqipërisë në BE”. Por nuk ka vonuar as përgjigja zyrtare e kryeministrit, një përgjigje deri në detaje, jo vetëm e çdo aludimi nga dyshja Meta-Basha, apo edhe e ndonjë politikani të huaj që keqinformohet nga SHQUP-i. “Përballemi në mejdan Lulzim”, një ftesë e sinqertë, korrekte, dhe serioze e një politikani të përgjegjshëm, që ka vendosur të respektojë Parlamentin, dhe Kushtetutën e vendit.
Mejdani i votave, është “fusha” më e mirë, ku ndeshen politikanët dhe partitë e tyre, ku ndeshen idetë dhe programet, ku ndeshen emrat e listave reale, dhe jo ata të mesnatës në bodrumet e SHQUP-it. O burra të shpëtojmë kryetarin e mirë Lulzim Basha, është thirrja që sot ka kapluar ithtarët dhe frikësit e humbjes, por ja, që vetëm vota e lirë do ta tregojë sa e sinqertë ka qenë “aleanca” e tij me Ilir Metën, dhe sa tinzar paralajmërimi se “do të ndizet flakë Tirana”.
