Temperaturat e larta janë rishfaqur në Shqipëri dhe me to edhe rreziku për shpërthimin e zjarreve.
Emergjencat Civile kanë dhënë informacion për situatën aktuale në vend, kun ë total ka patur gjatë orëve të fundit 7 vartra zjarri. Zjarret kanë rënë në zona të pyllëzuara, konkretisht në qarkun Shkodër, Fier, Berat, Dibër, Korçë dhe Durrës.
Emergjencat Civile njoftojnë se për shkak të të nxehtit, rreziku për rënien e zjarreve mbetet constant dhe i vazhdueshëm në shumicën e terrenit të republikës. Në këto kushte Emergjencat Civile i bëjnë thirrje qytetarëve që konstatojnë vatra zjarri që të telefonojnë numrat e emergjencave 112, 129, apo në Qendrën Kombëtare Operacionale të Emergjencave Civile në numrin 06941 10 198.
Situata me zjarret sipas qarqeve:
Në Qarkun e Shkodrës, në fshatin Oten, Shkodër në malin e Kakariqit ka rënë zjarr në një sipërfaqe të madhe me pyje dhe shkurre. Në ndihmë të zjarrfikësve, të cilat po punojnë me mjete rrethanore për të shuar flakët janë nisur edhe 20 forca ushtarake
Në Qarkun e Fierit, në fshatin Vadhiz, zjarri ka përfshirë një sipërfaqe shkurre dhe ullishte. Në ndihmë të zjarrfikësve të Fierit janë nisur edhe 20 forca të FNSH-së. Në fshatin Ferras, Fier një sipërfaqe me shkurre u përfshi nga flakët të cilat të favorizuara nga era po rrezikonin një banesë. Pas ndërhyrjes së zjarrfikësve zjarri është shuar.
Në Qarkun e Beratit, vatra e zjarrit në fshatin Bogovë, Çorovodë është riaktivizuar sërish. Forcat zjarrfikëse janë duke punuar me mjete rrethanore për të shuar flakët pasi terreni malor nuk lejon përdorimin e automjeteve të zjarrfikëseve
Në Qarkun e Dibrës, në fshatin Burgajet, Mat flakët kanë djegur një sipërfaqe prej 1 ha me dushk”. Për shuarjen e flakëve janë angazhuar 10 forca zjarrfikëse, të cilat janë duke punuar me mjete rrethanore për shkak të terrenit malor.
Në Qarkun Durrës, në Njësinë Administrative Borizan, Krujë zjarri përfshiu një sipërfaqe me shkurre. Nga flakët rrezikoheshin edhe disa banesa, po falë ndërhyrjes së zjarrfikësve zjarri është vendosur nën kontroll dhe më pas është shuar
Ndërsa në Qarkun e Korçës, në fshatin Zagorçan, Pogradec ka rënë zjarr në një zonë me shkurre dhe ferra. Si pasojë e flakëve është djegur një sipërfaqe prej 4 dynymësh”./a.m.
