Mesfushori i Dortmundit, Nuri Sahin, thotë se nuk do të harrojë kurrë fytyrat e bashkëlojtarëve pas shpërthimit afër autobusit të martën në mbrëmje.Një shpërthim i fuqishëm afër autobusit të Dortmundit kishte detyruar shtyrjen e ndeshjes ndaj Monacos në çerekfinale të Ligës së Kampionëve për të mërkurën. Si pasojë e shpërthimit mbrojtësi Marc Bartra u detyrua të operohej pas lëndimeve të pësuara në incident.
Pas traumës së pësuar ndeshja u zhvillua pas më pak se 24 orësh për të cilën trajneri Thomas Tuchel ka thënë se as ai e as futbollistët nuk ishin pyetur fare.
Pas takimit , të cilin Dortmundi e humbi 3 me 2, Sahin ka thënë se nuk di të gjejë fjalët për të përshkruar ndjenjën që kishte pasur.
“Është e vështirë, e vështirë të flas për këtë, e vështirë të gjej fjalët e duhura. E pamë disa herë këtë në TV, ishte shumë larg, madje edhe në Stamboll, në vendin tim, për natën e Vitit të Ri. Ishte ndjenjë e afërt, por ndodhi shumë larg nga ne. ..e përjetuam nga afër atë ndeshje. Nuk ia dëshiroj askujt që të ketë ndjenjë të tillë”, ka thënë ai për mediumin “Viasat” të Norvegjisë.
“Isha i shokuar. Kur hipëm në autobus, nuk mund t’i harroj fytyrat. Nuk do t’i harroj kurrë në jetën time. Kur e pash Marcun aty, kur u ula afër Schmelzer dhe pash fytyrën e tij, ishte e pabesueshme.
Nuk e di si njerëzit mund ta kuptojnë këtë, por deri sa u futa në fushë në pjesën e dytë, në të vërtetë, nuk mendoja për futboll fare. Më vonë e kuptova se çfarë ndodhi deri sa hapa dyert në shtëpi dhe pash se më prisnin gruaja dhe djali. Aty e kuptova sa me fat jemi.
E di se futbolli është shumë i rëndësishëm, e duam futbollin, vuajmë me futboll. E di se fitojmë shumë para, kemi jetë të privilegjuar, por jemi njerëz dhe kjo është më shumë se futbolli, dhe këtë e ndjemë …”, ka shtuar më tej ai, shumë i emocionuar, transmeton Koha.net. (b.an)
