Ish-kryeministri Sali Berisha pati dje një bisedë telefonike me Ndihmës Sekretaren e Shtetit, Victoria Nuland. Kjo bisedë u përqendrua kryesisht ne reformën në drejtësi. Ndihmës Sekretarja e Shtetit Nuland në bisedë theksoi rëndësinë e madhe të kësaj reforme për integrimin e Shqipërisë në Europë dhe shprehu vlerësimin e saj në përpjekjet e fundit të ambasadorëve të SHBA dhe BE për një kompromis midis palëve në ditët që vijnë.
Berisha theksoi se ai beson se “një kompromis, në rast se qeveria dëshiron reformën, është plotësisht i mundshëm. Kërkesa e opozitës për vende të rezervuara është një kërkesë anti-kapje, bazohet plotësisht në rekomandimet ndërkombëtare dhe qeveria nuk ka asnjë arsye të mos e pranojë”.
Ish-kryeministri theksoi se thjeshtimi i arkitekturës se institucioneve të drejtësisë është plotësisht i mundshëm dhe u shpreh se shpreson se palët do bien dakord.
Kërkesa e opozitës për të votuar, së bashku me nenet e reformës në drejtësi, edhe nenin për votimin dixhital, biometrik, do të dëshmonte vullnetin e qeverisë për një proces zgjedhor transparent, jetik për vendin.
Së fundi, Ndihmës Sekretarja e Shtetit, Nuland dhe Berisha vlerësuan shume të rëndësishëm një kompromis të mundshëm në ditët që vijnë./a.m.
