Të paktën 17 palestinezë janë vrarë si pasojë e sulmeve izraelite. Po ashtu raportohet se janë plagosur edhe dhjetëra civilë të tjerë palestinezë.
Sulmi ndodhi kur mijëra të zhvendosur iu afruan një vendi shpërndarjeje ndihmash të Fondacionit Humanitar të Gazës të mbështetur nga SHBA-të në Gazën qendrore.
Mjekët thanë se viktimat u dërguan me urgjencë në dy spitale, Spitalin Al-Aëda në kampin Nuseirat në Gazën qendrore dhe Al-Quds në Qytetin e Gazës, në veri.
Ushtria izraelite tha se po heton incidentin. Javën e kaluar i paralajmëroi palestinezët të mos i afroheshin rrugëve që të çojnë në vendet e shpërndarjes së ndihmave midis orës 6 pasdite dhe 6 të mëngjesit sipas kohës lokale, duke i përshkruar këto rrugë si zona ushtarake të mbyllura.
Fondacioni Humanitar i Gazës filloi shpërndarjen e pakove ushqimore në Gaza në fund të majit, duke mbikëqyrur një model të ri të shpërndarjes së ndihmave që Kombet e Bashkuara thonë se nuk është as i paanshëm dhe as neutral. Megjithatë, shumë banorë të Gazës thonë se duhet të ecin me orë të tëra për të arritur në vende, që do të thotë se duhet të fillojnë të udhëtojnë shumë para agimit nëse duan të kenë ndonjë shans për të marrë ushqim.
Ndërsa GHF ka thënë se nuk ka pasur incidente në të ashtuquajturat vende të sigurta shpërndarjeje, palestinezët që kërkojnë ndihmë kanë përshkruar çrregullime dhe rrugët e hyrjes në vende janë përfshirë nga kaosi dhe dhuna vdekjeprurëse.
Izraeli lejoi operacionet e kufizuara të udhëhequra nga OKB-ja të rifillonin më 19 maj pas një bllokade 11-javore në enklavën me 2.3 milion njerëz, ku ekspertët kanë paralajmëruar se një zi buke po afrohet. OKB-ja e ka përshkruar ndihmën e lejuar në Gaza si “pikë në oqean”.
Dëshmitarët thanë se të paktën 40 kamionë që transportonin miell për depot e OKB-së u plaçkitën nga palestinezë të zhvendosur të dëshpëruar, si dhe nga hajdutë pranë rrethrrotullimit Nabulsi përgjatë rrugës bregdetare në Qytetin e Gazës.
