Nuk na duhet Panamaja

Nga Ardit Rada

Botimi i dokumenteve zyrtare, qofshin ato vendase dhe aq më tepër të huaja, nuk përbëjnë ndonjë risi të paktën sa i përket shqiptarëve. Ndryshe ndodh në një vend ku opozitat nuk merren me denoncime familjarësh, e ndryshe tek ne që jemi regjur me luftën e re të klasave ku politikanët ia bëjnë njëri-tjetrit radioskopinë e farefisit brez pas brezi dhe tashmë qytetari i di gjërat kryesore.

Në fakt, ‘Panama Papers’ për rastin e Shqipërisë nuk pi ujë dhe as nuk do të sjellë ndonjë ‘boom’ në politikë, shoqëri etj. Ka qenë botimi i dokumenteve dhe kabllogramëve të Wikileaks ai që i pari i mësoi botës se ç’janë korrespondencat private, roli i diplomacisë në një vend të huaj, përfshirja në spiunllëqe dhe brryla të politikanëve për njëri tjetrin e të tjera si këto.

Sikurse dokumentet që Julian Assange nisi t’ia tregojë botës mbarë, ashtu edhe ‘Panama Papers’ nuk do t’i sjellë Shqipërisë asgjë veçse englendisjen e mediave dhe të lexuesve. Ose e thënë ndryshe, një kuriozitet për të marrë vesh të vërteta të mundshme, por që do të mbeten në nivel thashethemesh e nuk do të ndryshojnë asgjë në emra të përvetshëm e tendera të dhënë.

Sot, kur i gjithë faktori ndërkombëtar po i rri Shqipërisë si xhandari mbi kokë për të përmbushur disa udhëzime, vendit tonë nuk i duhen skandalet e Panamasë sepse asnjë institucion nuk i merr seriozisht. Shqipëria më shumë se kurrë sot ka nevojë për organ akuze që heton dhe bën shembuj zyrtarë dhe biznesmenë pranë politikës.

Nuk na duhet Panamaja, por vullneti i Prokurorisë, Byroja Kombëtare e Hetimit dhe spastrimi i çdo zyre të sistemit të Drejtësisë, mundësisht dhe të avokatëve e noterëve. Dhe kur të ndodh kjo, në mos e bëfshim vetë hetimin, të paktën do merren në konsideratë të dhënat e panamave!