Këshilli i Ministrave të Bashkimit Europian ka zgjatur masat kufizuese të BE-së, në dritën e veprimeve të vazhdueshme ndaj Federatës Ruse si pasojë e luftës në Ukrainë edhe për 6 muaj të tjerë, deri më 31 janar 2026.
Pas marrëveshjes së arritur midis ambasadorëve të BE-së të premten e kaluar, miratimi me procedurë me shkrim u përfundua të hënën. Ajo që bie në sy është fakti se Hungaria nuk e përdori veton e frikshme.
Masat përbëhen nga një spektër i gjerë masash sektoriale, duke përfshirë kufizime në tregti, financë, energji, teknologji dhe mallra me përdorim të dyfishtë, industri, transport dhe mallra luksi. Këto përfshijnë gjithashtu: ndalimin e importit ose transferimit të naftës bruto dhe produkteve të caktuara të naftës nga Rusia në BE nga deti, revokimin e SWIFT për disa banka ruse dhe pezullimin e aktiviteteve dhe licencave të transmetimit në Bashkimin Evropian të disa burimeve të dezinformimit të mbështetura nga Kremlini.
Përveç kësaj, masat specifike i lejojnë BE-së të kundërshtojë shmangien e sanksioneve.
“Për sa kohë që veprimet e paligjshme të Federatës Ruse vazhdojnë të shkelin normat themelore të së drejtës ndërkombëtare, duke përfshirë, në veçanti, ndalimin e përdorimit të forcës, është e përshtatshme të mbahen në fuqi të gjitha masat e vendosura nga BE dhe të merren masa shtesë, nëse është e nevojshme”, thuhet në shënimin e Këshillit.
Ndërkohë, sipas Kremlinit, paketa e 18 e sanksioneve e planifikuar nga BE-ja nuk do të çojë në fund të luftës së agresionit të Rusisë kundër Ukrainës.
“Vetëm logjika dhe argumentet mund ta sjellin Rusinë në tryezën e negociatave”, tha zëdhënësi i Kremlinit, Dmitry Peskov, për televizionin shtetëror të Moskës.
“Është e pamundur ta detyrosh Rusinë të largohet përmes çdo lloj presioni apo force”, shtoi ai.
Peskov shprehu besim se paketa e re e sanksioneve e kërkuar nga BE-ja do të miratohet përfundimisht. Megjithatë, sa më të ashpra të jenë sanksionet, aq më i fortë do të jetë kundërpërgjigjja. Sanksionet janë një “armë me dy tehe”, tha Peskov.
Moska vazhdimisht pretendon se vetë BE-ja vuan disavantazhe edhe më të mëdha si rezultat i sanksioneve, për shembull, duke hequr dorë nga lëndët e para ruse.
