Nga Podgorica në një bashkëbisedim me studentët malazez, Presidenti kroat Zoran Milanoviç tha se deklarata e nënshkruar me Shqipërinë dhe Kosovën për bashkëpunim në fushën e mbrojtjes dhe sigurisë nuk është shpallje e ndonjë aleance ushtarake.
Duke iu referuar polemikave nga Serbia, Milanoviç tha se “nga miza po bëhet një elefant i madh”, por aty nuk bëhet fjalë për aleancë, për ndonjë buxhet për një ushtri të përbashkët.
“Ky dokument nuk ka absolutisht asnjë peshë në kuptimin juridik. Është thjesht një gjest i vullnetit të mirë, një gjest, i cili është legjitim në politikë. Kosova, për fat të keq, nuk njihet nga disa shtete anëtare të NATO-s, ndërkohë që Shqipëria është pjesë e aleancës veriatlantike. Mali i Zi është gjithashtu në këtë aleancë. Deklarata ka shkaktuar shumë konfuzion por ajo nuk është një traktat ndërkombëtar në kuptimin e ngushtë të fjalës dhe as sipas ligjit kroat për traktatet ndërkombëtare. Serbisë nuk i ka pëlqyer madje presidenti Vuçiç e ka përdorur si justifikim për disa lëvizje politike të brendshme”, është shprehur Zoran Milanoviç.
Presidenti kroat Zoran Milanoviç tha se Mali i Zi duhet që të bëhet sa më shpejt anëtar i Bashkimit Evropian, pavarësisht çështjen se anijes “Jadran”.
Nga ana e tij presidenti malazez Milatoviç vuri në dukje se synimi kryesor i politikës së jashtme të Malit të Zi është anëtarësimi në Bashkimin Europian deri në vitin 2028.
