Durim Bami, “shënjestra” e atentatit të dështuar të 4 nëntorit, është paraqitur vetë ditën e sotme në Komisariatin e Krujës. Bami ka dhënë deponimin e tij lidhur me gjithë çfarë ka ndodhur disa ditë më parë në urën e Tapizës.
Mësohet se gjatë dëshmisë së tij, i ashtuquajturi “i forti i Niklës” ka pohuar në Polici se është larguar dhe ka qëndruar i fshehur pasi i druhej një atentati të dytë, pas dështimit të të parit. Në rrëfimin e tij ka shtuar se nuk ka arritur që të identifikojë asnjë prej personave që e kanë qëlluar dhe kanë plagosur shokun e tij.
“Nuk arrita t’i njoh personat që më qëlluan. U largova dhe u fsheha pasi i druhesha një sulmi me armë,“-është shprehur Bami.
Nga atentati i dështuar mbeti i plagosur krahu i djathtë i Durim Bamit, Ervin Kodra, i cili që ditën e ngjarjes tha në Polici së nuk kishte qënë ai shënjestra. Ndërkohë Policia ka nisur nga puna për identifikimin dhe kapjen e autorëve të ngjarjes.
Por kush është Durim Bami?
I dënuar më herët për vjedhje me armë, Bami zuri titujtë kryesorë të mediave në vitin 2015, për një atentat të pretenduar nga deputeti Tom Doshi. Dosja përfundoi në prokurori, ku u zbulua dhe inskenimi. Tom Doshi, Mark Frroku dhe Durim Bami u akuzuan për kallëzim të rremë, pasi Doshi akuzoi presidentin e sotëm Ilir Meta, se i kishte porositur një atentat me një pagesë prej 500 mijë euro.
g.kosovari
