Deputeti i Partisë Socialiste, Petro Koçi, ka komentuar përplasjet e ashpra që ndodhën dje në Kuvend mes mazhorancës dhe opozitës. I ftuar në studion e News24 me gazetaren Ola Bruko, Koçi i cilësoi tensionet si një skenar të mirëmenduar nga opozita për të bllokuar procesin e votimit të ndryshimeve në Kodin Zgjedhor.
Sipas Koçit, opozita përdori një sebep procedurial për të krijuar kaos, pavarësisht se rendi i ditës ishte përcaktuar qartë nga Konferenca e Kryetarëve.
“Ishte një skenar i parapërgatitur. Nuk donin të votonin ndryshimet në Kod dhe u gjet një sebep procedurial. Ka një agjendë nga Konferenca e Kryetarëve, votohet në seancë dhe vijohet normalisht. Nuk ishte çështja Veliaj shkaku, ishte thjesht sebepi i dikujt,” u shpreh Koçi.
Deputeti socialist theksoi se raste të ngjashme kanë ndodhur edhe më parë, duke përmendur arrestimin e Sali Berishës, por pa shoqëruar incidente të këtij niveli në sallën e Kuvendit.
“Ka ndodhur edhe herë të tjera kur dikush është ndaluar apo arrestuar, si rasti i Berishës, dhe nuk kanë ndodhur ngjarje të tilla,” tha Koçi.
