Drejtuesi politik i Partisë Socialiste për Qarkun e Vlorës Damian Gjiknuri bashkë me Kryetarin e Bashkisë Dritan Leli dhe drejtorin rajonal të OSHEE-së Erion Osmanaj zhvilluan një takim me përfaqësuesit e bizneseve që veprojnë në zonën e Novoselës.
Bizneset e pranishme u njohën nga afër me planin e Operatorit të Shpërndarjes për rindërtimin e rrjetit elektrik, puna për të cilin nis brenda muajit Mars.
“Si deputet i kësaj zone kam qenë i ndërgjegjësuar që një ndër problemet e Novoselës ishte furnizimi me energji elektrike. Kjo zonë është kthyer në një hapësirë industriale, prodhuese dhe eksportuese e Vlorës. Problematika e rrjetit elektrik duhej patjetër të adresohej pasi dihet se është një problem i trashëguar. Rrjeti ka qenë i vjetër dhe bizneset këtu janë shtuar duke rritur dhe kërkesën për energji. Kemi patur mundësinë të miratojmë një buxhet i cili tashmë është në procedurë prokurimi dhe shumë shpejt do të lidhet kontrata”, theksoi Gjiknuri.
Kryebashkiaku i Vlorës Dritan Leli deklaroi se kjo paketë investimi e OSHEE do ti japë zgjidhje njëherë e mirë problematikës së madhe të furnizimit me energji për bizneset.
“Shumë shpejt do të ketë një zgjidhje paralele edhe për problemin e furnizimit me ujë të pijshëm. Të lidhura bashkë, energjia elektrike dhe furnizimi me ujë rrisin standardin për të patur një cilësi më të mirë jetë dhe për të bërë biznes në këtë zonë”, nënvizoi Leli.
Deri më tani, OSHEE ka investuar në këtë zonë për rikonstruksionin e rrjetit që furnizon me energji fshatrat: Bishan, Poro, Akërni, Aliban, Fitore e Novoselë.
Brenda muajit Mars fillon faza e re e investimit për ndërtimin e fiderit të ri Mifol-Novoselë që do të ndikojë drejtpërdrejt në rritjen e cilësisë së furnizimit për 2360 abonentë familjarë dhe 350 abonentë privat.
“Kemi programuar investimin e katër fiderave nga nënstacioni Mifol e më tej gjithë pjesën që përfshin autostradën Levan-Vlorë. Këtu flasim jo vetëm për bizneset por edhe për abonentët familjarë të fshatrave. Nga Novosela, në Mifol dhe deri në Panaja do të ndjejnë një ndryshim të madh në furnizimin me energji pas këtij investimi”, u shpreh drejtori rajonal i OSHEE-së Erion Osmanaj.
Një tjetër investim është ai i rikonstruksionit të rrjetit ekzistues 10 kV të tensionit të mesëm, kabinat dhe rrjetin e tensionit të ulët në fshatin Mifol. Ndërhyrje do të ketë edhe në linjën që furnizon kryesisht bizneset në rrugën nacionale Mifol-Panaja.
Drejtori i OSHEE-së Osmanaj theksoi se do të ndërhyhet edhe për rrjetin e tensionit të ulët në fshatrat Skrofotinë, Cerkovinë, TreVllkazër, Panaja dhe Oshtimë. Investimet do të prekin edhe rrjetin që furnizon hidrovorin Akërni dhe bizneset në autostradën Levan-Vlorë.
Pas takimit, Gjiknuri dhe Leli inspektuan edhe mjediset e dy prej sipërmarrjeve që po e zgjerojnë tanimë aktivitetin duke rritur drejtpërdrejt edhe e numrit të të punësuarve.
/a.meta
