Ish-kryeministri i vendit, Sali Berisha ka zgjedhur të shpërndajë në rrjetet sociale mesazhin e urimit të ish-Presidentit amerikan për shqiptarët në ditën kur SHBA dhe Shqipëri festojnë 100-vjetorin e vendosjes së marrëdhënieve diplomatike.
Sali Berisha nuk ishte sot i ftuar në ceremoninë e kremtimit të 100-vjetorit të vendosjes së marrëdhënieve Shqipëri-SHBA. Sigurisht fakti që është i shpallur ‘non grata’ e bën zero shansin që ai të jetë i pranishëm në një aktivitet të tillë.
Por siç ka bërë rëndom në të gjithë këto muaj, që pas shpalljes ‘non grata’ nga SHBA dhe tashmë nga Mbretëria e Bashkuar, Berisha ‘gjen strehim’ për t’iu justifikuar mbështetësve të vete, tek George Bush.
Siç ka bërë shpesh me postimet e takimeve që ka pasur me presidentët Bush, Berisha këtë herë ka zgjedhur të shpërndajë në rrjetet sociale mesazhin e urimit të ish-Presidentit amerikan për shqiptarët dhe jo atë të Presidentit aktual Joe Biden!
Berisha: Mesazh i mikut të madh të kombit shqiptar, Presidentit George W. Bush me rastin e 100 vjetorit të vendosjes së marrëdhënieve diplomatike midis dy vendeve.
Këtu më poshtë keni mesazhin e tij të plotë.
Unë dhe Laura ju dërgojmë përshëndetje dhe urimet më të ngrohta për mbarë popullin shqiptar teksa festojmë 100-vjetorin e marrëdhënieve diplomatike midis Shteteve të Bashkuara dhe Shqipërisë, ky gur kilometrik i veçantë është një dëshmi i miqësisë midis dy vendeve tona dhe vlerave tona të përbashkëta demokratike. Në vitin 2007 isha krenar që u bëra presidenti i parë i Shteteve të Bashkuara që vizitonte Shqipërinë. Laura dhe unë nuk e harrojmë kurrë kohën që kaluam në vendin tuaj të bukur. Ne u bëmë vetë dëshmitarë të mikpritjes suaj të sinqertë dhe të përkushtimit tuaj ndaj demokracisë dhe marrëdhëniet e forta me Shtetet e Bashkuara.
Kujtoj gjithashtu pasionin tuaj për zhvillim dhe tolerancë. Jam i lumtur të shoh Shqipërinë dhe Shtetet e Bashkuara teksa vazhdojë të punojnë krah për krah si aleatë në NATO dhe në Këshillin e Sigurimit të OKB-së duke mbrojtur demokracinë, paqen dhe të drejtën e njeriut. Shpirti shqiptar që kurrë nuk resht së përpjekuri për liri dhe tradita juaj e besës për t’u shtrirë dorën e ndihmës njerëzve në nevojë, janë vlera të cilat shpresoj do të bëhen shembull për të tjerët. Shqipëria është një forcë e së mirës në botë dhe Shtetet e Bashkuara janë krenare që e quajnë mike dhe aleate. Gëzuar të gjithëve 100-vjetorin e miqësisë sonë jetëgjatë!
Ambasada e SHBA-së në bashkëpunim me ministrinë e Jashtme ditën e sotme organizuan një event të kuadër të përvjetorit. Të pranishëm ishin edhe përfaqësues të opozitës që nga Lulzim Basha e deri te Agron Gjekmarkaj. Ndërsa Sali Berisha nuk ishte i pranishëm./m.j
