Deputeti demokrat Flamur Noka, në një konferencë për gazetarët nga selia blu, ka folur në lidhje me mbledhjen e djeshme të grupit parlamentar, e cila pavarësisht kohëzgjatjes, nuk arriti që të sillte tym të bardhë për qëndrimet e dy palëve në PD.
Noka akuzoi Alibeajn se është i marrë peng, dhe vazhdon të bëjë lojën e Lulzim Bashës dhe Edi Ramës, për të përçarë opozitën.
“Siç jeni në dijeni , pas datës 6 Mars, të gjithë mazhoranca brenda PD-së, duke filluar nga Sali Berisha dhe gjithë të tjerët, ka pasur një devizë bashkimi. Për fat të keq, ju edhe mbrëmë e konstatuat, Enkelejd Alibeaj nuk ka lidhje me bashkimin, po vazhdon lojën e Bashës dhe Ramës për të përçarë PD-në.
Çfarë është diskutuar në mbledhjen e grupit të PD-së është kjo, të gjithë janë kundër qendrimit përçarës të Enkelejd Alibeajt, askush nuk e ndoqi kur u çua dhe u largua nga mbledhja. Nëse Alibeaj është peng, siç ishte dhe Basha iu them se deputetët janë të lirë, për ta bërë PD një forcë fituese.
Ky është një proces përbashkues, asgjë nuk e ndal, pengjet bëjnë punën e tyre, demokratët janë në punën e tyre”, tha Noka.
Nëse Alibeaj tërheq padinë në apel, a jeni ju të gatshëm që ti shtyni zgjedhjet që po bëni në degë?
Noka: Mendoni ju se është përbashkues ideja e hedhjes në gjyq të partisë tënde, a mund të jetë kjo bashkuese? A mund ta gëzojë karrigen e kreut të grupit një njeri, që mban gjallë frymën e përçarjes. Kjo është arsyeja se pse të gjithë deputetët i kërkuan zotit Alibeaj që të tërhiqte padinë. Askush tjetër veç Gaz Bardhit nuk guxon dot që të thojë se ka pasur mbledhje të forumeve.
/b.h
