Nju Jorku ka nevojë për ndryshim, ndoshta radikal. Ky është mesazhi kryesor i debatit të fundit midis kandidatëve demokratë për postin e kryebashkiakut të metropolit, i cili u zhvillua ditën e djeshme.
Duke qenë se praktikisht fitorja demokrate në zgjedhjet zyrtare është qartë dhe e padiskutueshme, fituesi brenda asaj partie cilësohet edhe si kryebashkiaku i ardhshëm i qytetit me më shumë se 8 milionë banorë, e njohur edhe si “Big Apple”, Molla e Madhe.
Janë 22 kandidatët zyrtarë, por përtej mburrjes për disa rreshta të shkruara në mediat lokale, vetëm 8 kanë ambicie reale, dhe prej tyre katër duken realisht në garë për fitore. Të ndarë nga historia personale, profesioni, statusi ekonomik por edhe nga ngjyra, kandidatët u bashkuan vetëm në kundërshtimin e tyre nga politika e “vjetër”.
Në fakt, nuk është tërësisht kështu. Një nga kandidatët favoritë është Eric Adams, kryetari i “minibashkisë” së Bruklinit, në fakt një metropol në vete, me historinë e saj të veçantë. Ish-drejtues i rëndësishëm policie, Adams është një nga katër kandidatët afro-amerikanë në garë.
Të tjerët janë ish-menaxheri i Citybank Raymond McGuire, Maya Wiley dhe Dianne Morales, ku dy të fundit përfaqësojnë të majtën më radikale, e përqendruar në pabarazitë racore, në kufizimin e policisë dhe në mbështetje të klasave më të varfra. Një kandidat i cilësuar si serioz, ish-ministri i Obamës Shaun Donovan duket larg nga fitorja, ashtu si Scott Stringer, ish-drejtori i financave të qytetit.
Debati racor dhe ai mbi policinë ka qenë në qendër të diskutimeve, por analistët kanë kritikuar faktin që debati nuk paraqiti një vizion të qartë afatmesëm për një nga qytetet simbol të botës perëndimore.
Deri pak javë më parë personazhi më i njohur ishte Andrew Yang, avokati me origjinë kineze që kandidoi edhe për postin e presidentit amerikan, por kandidatura e tij duket në ulje sipas sondazheve, që ende duken të paqarta për fituesin real, edhe pse mendohet për një duel midis Adams dhe Kathyrn Garcia, ish-këshilltare e kryebashkiakut Bill De Blasio, që mund të mobilizojë edhe komunitetin e gjerë latino-amerikan./m.j
