Presidenti francez Emmanuel Macron planifikon ta njohë Palestinën si shtet në shtator.
Kjo ka për qëllim të nxisë procesin e paqes në Lindjen e Mesme. Kryeministri Netanjahu e dënon vendimin.
Presidenti francez Emmanuel Macron njoftoi se Franca do ta njohë Palestinën si shtet. “Do ta shpall solemnisht këtë në shtator të këtij viti para Asamblesë së Përgjithshme të Kombeve të Bashkuara”, njoftoi Macroni në Platformën X. Macroni shtoi: “Sot, është urgjente të përfundojë lufta në Rripin e Gazës dhe të shpëtohet popullsia civile”. Një armëpushim, lirimi i të gjithë pengjeve dhe ndihma masive humanitare për popullsinë e Rripit të Gazës janë të nevojshme “pa vonesë”. Për më tepër, Hamasi duhet të çmilitarizohet dhe Rripi i Gazës duhet të rindërtohet.
Krijimi i një shteti palestinez duhet të paraprihet nga një armëpushim në Rripin e Gazës. Ministria e Jashtme izraelite refuzoi të komentojë deklaratën e Macron.
Sipas disa informacioneve, Macroni kishte planifikuar tashmë ta shpallte njohjen muajin e kaluar, por e shtyu për shkak të konfliktit midis Izraelit dhe Iranit.
Asambleja Kombëtare Franceze kishte votuar tashmë në favor të njohjes së një shteti palestinez në vitin 2014. Megjithatë, votimi nuk ishte detyrues për qeverinë. Pas Rusisë dhe Kinës, Franca do të ishte fuqia e tretë me të drejtë vetoje në Këshillin e Sigurimit të OKB-së që do të njihte një shtet palestinez. Në nivel ndërkombëtar, më shumë se 140 vende e kanë bërë tashmë këtë. Gjermania nuk bën pjesë në to.
Netanjahu kundër Macron
( E akt.)Kryeministri izraelit Benjamin Netanjahu e dënoi ashpër njoftimin e Presidentit Macron për njohjen e Palestinës si shtet. “Një hap i tillë shpërblen terrorin”, tha zyra e Netanyahut në një deklaratë. Kjo gjithashtu rrezikon krijimin e një shteti përfaqësues të Iranit, siç u bë Rripi i Gazës nën Hamasin, kritikohet vendimi i Macron nga kryeministri izraelit. “Një shtet palestinez në këto kushte do të ishte një platformë startimi për shkatërrimin e Izraelit.”
Edhe nga Shtetet e Bashkuara vijnë kritika për njoftimin e bërë nga Presidenti francez Emmanuel Macron mbi njohjen e Palestinës si shtet. “Ky vendim i pamatur i shërben vetëm propagandës së Hamasit dhe pengon paqen”, shkroi Sekretari i Shtetit i SHBA-së Marco Rubio në X. Ai është një shuplakë për viktimat e masakrës së kryer nga Hamasi islamist dhe grupe të tjera terroriste në Izrael më 7 tetor 2023. Lufta në Gaza shpërtheu si pasojë e sulmit të Hamasit, që njihet si organizatë terroriste nga SHBA, BE e vende të tjera, gjatë të cilit u rrëmbyen më shumë se 250 persona në Rripin e Gazës dhe u vranë më shumë se 1,200 të tjerë.
Negociatat pa sukses
Negociatat për një armëpushim në Rripin e Gazës nuk kanë dhënë rezultate. Shtetet e Bashkuara tërhoqën delegacionin e tyre nga Katari për konsultime dhe akuzuan Hamasin për mungesë vullneti për të arritur një marrëveshje.
I dërguari i Presidentit Trump, Steve Witkoff, ka deklaruar se Shtetet e Bashkuara po tërhiqen nga bisedimet për armëpushim në Gaza, të mbajtura në Doha të Katarit. Witkoff e akuzoi Hamasin për mbajtjen e një “qëndrimi egoist”. Hamasi, përgjegjës për sulmet terroriste të 7 tetorit 2023, vazhdon të mbajë pengje izraelite. /REL
