Rukola është e pasur me vlera ushqimore dhe antioksidantë. Ajo është një burim i pasur me vitaminë A, fibër, vitaminë C, vitaminë K, folat, hekur, kalcium, fosfor, magnez, mangan dhe kalium. Në lashtësi, rukola përdorej për përgatitjen e një ilaçi së bashku me barishte të tjera që quhej “Livanda”, dhe përdorej për të shmangur lodhjen muskulare.
Shqiptarët e kanë kultivuar rukolën pas viteve 90’, ndërkohë që të gjitha vendet e tjera të Mesdheut kanë shfrytëzuar vlerat e saj shumë më herët.
Rukolën në Shqipëri e gjejmë me dy lloje, shkruan agroweb.com, me gjethe të vogla dhe rukola me gjethe të mëdha. Në tregun fshatar, rukolë gjethemadhe e quajnë edhe rukola e restoranteve, pasi është më e lehtë për t’u larë e pastruar se sa ajo me gjethe të vogla. Por vlerat i kanë të njëjta, pavarësisht formës së gjetheve.
Arugula ose rukola siç dhe e njohim më shumë, është një nga ato perime që qëndrojnë në piedestal për shkak të shumë vitaminave e mineraleve. Për më tepër, fibrat tek rukola ndihmojnë në aparatin tretës dhe duke bërë që të ndiheni të ngopur për një kohë më të gjatë. /b.d
