Robert Kulla, djali i “gjeneralit” Nehat Kulla, është njëri prej të arrestuarve si i dyshuar për grabitjen e bankës së nivelit të dytë në zonën e ish- Bllokut në Tiranë. I biri i një prej të fortëve më të njohur që kanë komanduar zonën e Linzës, por jo vetëm, në vitin 1997 në Tiranë, është gjithashtu një personazh i njohur për policinë, shkruan “Panorama”.
Emri i tij figuron në disa dosje të Policisë së Shtetit, madje edhe zyrtarisht dje u tha se Robert Kulla kishte qenë i dënuar më parë për rrëmbim personi dhe armëmbajtje pa leje. Babai i tij, në vitin 2005 u arrestua nga forcat speciale RENEA, gjatë një operacioni të befasishëm.
Në momentin kur në shtëpinë e Nehat Kullës hynë forcat speciale, “gjenerali” u gjet në shoqërinë e të birit, Robertit, i cili po ashtu u prangos bashkë me të.
Burimet policore bënë të ditur në atë kohë se Nehat Kulla u arrestua pas nxjerrjes së një vendimi nga Gjykata e Krimeve të Rënda. Ai akuzohet të ketë ekzekutuar në vitin 1998 shoferin i ish-ministrit të Brendshëm, Halit Shamata.
Viktima Halim Gjuzi kishte pasur probleme me të ashtuquajturin “gjenerali”, gjatë periudhës kur ishte shofer i kreut të dikasterit blu. Ndërkohë që arrestimi i Robert Kullës, që në atë kohë ishte 23 vjeç, u bë pas kontrollit dhe sekuestrimit të armëve që mbaheshin në shtëpinë e tyre.
ARRESTIMI
NE 2012 Në vitin 2012, më 17 dhjetor, Robert Kulla u ndalua si i dyshuar për tentativën e vrasjes së biznesmenit Redi Dizdari. Kulla u prangos teksa lëvizte me makinën e tij bashkë me shtetasin Herigert Çitaku, edhe ky i dyshuar si pjesëmarrës në tentativën për vrasje. Pas verifikimit në Polici, Robert Kulla u la i lirë, pasi pistoleta që u gjet në makinën e tij nuk i përkiste atij, por shtetasit Çitaku.
Burime nga Policia e Tiranës thanë në atë kohë se i arrestuari ishte Herigert Çitaku, i dyshuar edhe për dy ngjarje të tjera kriminale të ndodhura në Tiranë dhe Durrës. Ai u ndalua në afërsi të Babrrusë, kur po lëvizte me makinë bashkë me djalin e “gjeneralit” Nehat Kulla, i cili ndodhet në burg, i dënuar me 20 vjet heqje lirie.
Fillimisht ata u shoqëruan në Drejtorinë e Policisë së Tiranës, por pasi iu morën deklarimet, Robert Kulla u la i lirë. Çitaku ishte shpallur në kërkim që prej ditës kur ndodhi plagosja e Redi Dizdarit, në orët e para të mëngjesit të datës 9 dhjetor 2012.
Burime të Policisë së Tiranës thanë se autori i dyshuar për tentativën e vrasjes së pronarit të buzukut në zonën e 9-katësheve ishte edhe 22-vjeçari Gerhart Hasan Shabanaj nga Shkodra, i cili gjithashtu u shpall në kërkim. Plagosja e biznesmenit Dizdari ndodhi për shkak të konflikteve të vazhdueshme dhe përplasjeve fizike të mëparshme që ai kishte pasur me një prej të dyshuarve të ngjarjes, Herigert Çitaku, i cili e frekuentonte vazhdimisht lokalin e tij me muzike live.
Biznesmeni nga Shkodra, Redi Dizdari, në orën 04:30 të datës 9 dhjetor kishte dalë nga lokali i tij dhe po lëvizte në drejtim të kryqëzimit të “Selvisë”. Ai u qëllua pesë herë me armë zjarri nga një person që, sipas Policisë së Tiranës, i kishte zënë pritë në një distancë jo shumë të largët. Autori i dyshuar i ngjarjes ndodhej në një makinë tip “Benz”, me targë TR 5607 T, dhe ka qëlluar me pistoletë në drejtim të Dizdarit.
