Një vit pas vrasjes së shtetases amerikane Aysenur Ezgi Eygi nga forcat izraelite, bashkëshorti i saj, Hamid Ali, thotë se jeta e tij është ende e mbushur me dhimbje dhe konfuzion.
“Ka qenë shumë e vështirë të mësohem me jetën pa Aysenurin, një shtëpi bosh, të shoh se çfarë efekti ka pasur kjo tek babai i saj dhe familja. Fjala që do ta përshkruante më shumë është konfuzion,” tha Ali për Al Jazeera.
Eygi, me origjinë turke dhe vetëm 26 vjeçe, u qëllua për vdekje më 6 shtator 2024 në Bregun Perëndimor të pushtuar, gjatë një proteste kundër një vendbanimi të paligjshëm hebre.
Që prej vitit 2022, të paktën 10 shtetas amerikanë janë vrarë nga ushtarë dhe kolonë izraelitë në Bregun Perëndimor, mes tyre edhe gazetarja e njohur e Al Jazeera-s, Shireen Abu Akleh.
“Kërkojmë drejtësi, edhe nëse nuk vjen kurrë“
Shtetet e Bashkuara, si nën administratën e Joe Bidenit ashtu edhe tani me Donald Trump, kanë refuzuar të hapin një hetim amerikan për vrasjen e Eygi, duke i kërkuar Izraelit të hetojë vetë incidentin.
“E dimë që drejtësia mund të mos vijë shpejt, ndoshta asnjëherë, por nuk do të ndalemi së kërkuari llogaridhënie. Aysenur e meriton, dhe çdo jetë e marrë padrejtësisht nga Izraeli e meriton,” tha motra e saj, Ozden Bennett.
Familja ka zhvilluar takime me zyrtarë të lartë amerikanë, përfshirë ish-sekretarin e Shtetit Antony Blinken, por pa rezultate konkrete. “Ai na dha një ngritje supesh, si të thoshte se nuk ka çfarë bën,” shprehet Ali.
“Hipokrizi e tmerrshme”
Ndërkohë, SHBA ka ndërmarrë hetime të shpejta për vrasjen e qytetarëve të saj nga grupe të tjera, përfshirë Hamasin, duke ngritur akuza për “terrorizëm dhe konspiracion për vrasje”. Por kur viktima është vrarë nga Izraeli, nuk ka pasur asnjë veprim serioz.
“Kjo tregon se jo çdo jetë amerikane ka të njëjtën vlerë për Washingtonin,” tha Bennett.
Raed Jarrar, nga organizata amerikane për të drejtat e njeriut DAWN, u shpreh:
Hipokrizia është tronditëse. Kur amerikanët vriten nga dikush tjetër, qeveria përdor çdo mjet diplomatik dhe ushtarak për drejtësi. Kur ata vriten nga Izraeli, SHBA-të mjaftohen me justifikime, dërgon më shumë armë dhe e mbron Izraelin nga çdo llogaridhënie ndërkombëtare.
Izraeli mohon, familja nuk beson
Një raport paraprak i ushtrisë izraelite tha se Eygi u vra “pa dashje dhe në mënyrë indirekte”, por dëshmitarët pretendojnë se ajo u qëllua në kokë nga një snajper.
Familja thotë se çdo hetim izraelit është i pavlefshëm. “Izraeli nuk mund të hetojë vrasjen që e ka kryer vetë. Është e papranueshme,” u shpreh Bennett.
Për Hamid Ali, dhimbja mbetet e madhe, por kujtimi i Aysenurit është bërë pjesë e një kauze më të madhe:
Ndoshta drejtësia nuk do të vijë shpejt, por jam i bindur se një ditë do të vijë, qoftë përmes kujtimit të saj që frymëzon të tjerët, qoftë përmes lirisë së popullit palestinez.
