Shkencëtarët nga Universiteti i Kalifornisë në Riverside kanë emëruar katër lloje të reja insektesh bimore nga Australia sipas këngëtares dhe kompozitores amerikane Taylor Swift dhe albumeve të saj, si pjesë e një studimi që përshkroi gjithsej 12 lloje deri më tani të panjohura.
Puna mbi specien e re u botua në revistën “Insect systematics and evolution”. Një gjini e re është quajtur “Swiftiephylus”, e cila kombinon nofkën “Swifty” për fansat e Taylor Swift dhe emrin “Phylus”, i përdorur shpesh për këtë grup insektesh, sipas Variety.
Katër speciet emërtohen “Swiftiephylus taylorae”, “Swiftiephylus amator”, “Swiftiephylus intrepidus” dhe “Swiftiephylus poetorum”, të frymëzuara nga versionet latine të emrit të Taylor, si dhe nga titujt e albumeve të saj “Lover”, “Fearless” dhe “Poets”.
Studiuesit thonë se insektet janë të lidhura ngushtë me një specie australiane të njohur si lisi i shkurreve, i cili rritet në një sërë habitatesh, nga pyjet tropikale te dunat bregdetare dhe zonat me temperatura jashtëzakonisht të larta.
Studentja e doktoraturës në entomologji, Sarah Schroeder, vendosi ta emërojë specien e re sipas Swift për të tërhequr vëmendjen ndaj diversitetit ende të pazbuluar të insekteve dhe rëndësisë së ruajtjes së tyre.
“Si një fans i përjetshëm i Taylor, më dukej e natyrshme ta nderoja atë në këtë mënyrë, por edhe të tërhiqja vëmendjen ndaj diversitetit të insekteve që ende nuk janë zbuluar”, tha Schroeder.
Ajo gjithashtu vuri në dukje ngjashmërinë në pamjen e këngëtares dhe insektit, ngjyra e të cilit është e verdhë e zbehtë me detaje të kuqe. Sipas saj, një kombinim i tillë u lejon atyre të kamuflojnë veten midis luleve të bimëve pritëse, të cilat kanë struktura të holla me ngjyrë të kuqe në portokalli.
Sipas Universitetit të Kalifornisë, Riverside, speciet e reja nuk dihet të jenë të dëmshme për njerëzit ose kafshët.
Ato i përkasin familjes Miridae, familjes më të madhe të pleshtave të shtratit, e cila përfshin më shumë se 11,000 lloje të përshkruara në të gjithë botën.
