Autoritetet ukrainase kundër korrupsionit, NABU dhe SAPO, kanë nisur një aksion ndaj zyrtarëve të Prokurorisë së Përgjithshme, të dyshuar për përfshirje në një rrjet kriminal që lidhet me mashtrime përmes të ashtuquajturave “call center”.
Hetimi, i koduar “Kartagjena”, bazohet mes të tjerash në regjistrime audio të cilat sugjerojnë se zyrtarë të lartë të Prokurorisë kanë marrë ryshfete në këmbim të mbrojtjes së këtyre kompanive nga ndjekja penale.
Një zyrtar i lartë, i përmendur në incizime me pseudonimin “Kancelari”, është arrestuar, shkruan DW. Dyshimet kanë prekur edhe ish-Prokurorin e Përgjithshëm, Ruslan Kravçenko, i cili ka dhënë dorëheqjen dhe mohon çdo përfshirje në aktivitete të paligjshme. Regjistrimet përmbajnë referenca që, sipas hetuesve, mund të lidhen me të, ndërsa pretendohet se një zyrtar i përfshirë i ka kryer edhe shërbime private.
Sipas organizatës Iniciativa Globale kundër Krimit të Organizuar Transnacional, në Ukrainë operojnë rreth 1,000 “call center-a” të paligjshme, ku dyshohet se punojnë rreth 60,000 persona. Të ardhurat e një kompanie të tillë vlerësohen mesatarisht në rreth 1 milion dollarë në muaj.
Hetimet tregojnë se zyrtarë të Prokurorisë mund të kenë marrë qindra mijëra dollarë në muaj ryshfete për të mbrojtur një pjesë të këtyre kompanive.
Skandali vjen në një periudhë të ndjeshme për Ukrainën, e cila po përballet me luftën me Rusinë dhe presion të vazhdueshëm për forcimin e luftës kundër korrupsionit.
