Nga Enkel Demi
Unë jam tifoz futbolli. Shoh pa fund ndeshje, të tëra kampionatet e rëndësishme, kam skuadrat e mia që bëj tifo, blej bluza, marr pjesë në forume, kam opinionet e mia, madje shaj, mallkoj, qaj, gëzoj, jap mend si gjithë tifozët e këtij sporti në këtë tokë. Natyrisht, një njeri si unë nuk ka si mos marroset pas Kombëtares, ndaj shkova në Lens, ndoqa ndeshjen e parë, u ngjira, u trishtova dhe me të njëjtin pasion ndoqa të tëra sfidat e tjera në televizor. Jam i kënaqur që djemtë u pritën mirë nga autoritetet, kur u kthyen në Tiranë, megjithëse e kam të vështirë të kuptoj përse duheshin aq shumë fjalime, çelësi i Tiranës, transmetimi i drejtpërdrejtë i aplikimit për pasaportë diplomatike. Por, ne si popull rëndom nuk dimë të festojmë, ashtu si nuk dimë të përjetojmë fatkeqësi. Një milionë euro shpërblim tash që u eleniminuam nuk u pritën mirë nga një pjesë e njerëzve, por nejse, meqë futbolli është një sport që të marros, në entuziazëm e sipër edhe kjo ndodh.
Unë pëlqej pa masë atletikën. Po pres me padurim Olimpiadën për t’u ngulur para TVSH-së për të parë të gjitha garat e saj deri tek maratona nga fillimi në fund. Gara e 3000 metrave me pengesa është një nga garat më të bukura, e cila kërkon mjaft zgjuarësi, taktikë, rezistencë. Pikërisht këtu, një zonjë shqiptare po shkëlqen. Luiza Gega ka dalë e dyta në Europë dhe sipas trajnerit të saj, Taulant Stërmasi po të kishte mundësi të stërvitej më shumë me pengesat, ndoshta e kishim edhe më lart. Luiza, e cila i përket grupit “O sa mirë me ken’ shqiptar” stërvitet nga liqeni. Nuk ka kushte në Shqipëri dhe i është dashur që për Europianin të vejë deri në Kenia. Veç një mesazhi të ministres së Mbrotjes, Mimi Kodheli, askush nuk është ndjerë për të. Disa shkrime në media dhe kaq. Ministrja e Sporteve nuk ka marrë asnjë koment mbështetës nga shokët e vajzës, ndaj nuk ia ka vënë në pullë atletes. Erioni i harxhoi çelësat për këtë sezon, ndërsa kryeministri nuk ka nge të dalë në aeroport, sepse bën vapë. Stërmasi i ka kujtuar edhe ato një milionë eurot që u dhanë për ata që u eleminuan. Me siguri ai është modest dhe do i kishin hyrë në punë edhe 1/10 e tyre, por nuk ka për të marrë gjë, sepse ka idhnuar ata që të shpërblejnë.
Tani që Luiza ka dalë e dyta në Europian dhe çunat me pasaporta diplomatike janë eleminuar nga një tjetër Europian nga duhet të anojë peshorja? Pa dyshim tek futbolli, por kjo nuk duhet të zbehë këtë sportiste dhe askënd tjetër që përpiqet në një tjetër disiplinë. Nëse do të kishim vëmendje për sportet, rikthenim klasat sportive, masivizonim aktivitetin sportiv, ndërtonim terrene. Kështu, jo vetëm do mbilleshin kampionë, por të rinjtë nuk do kishin heronj personazhe tallavaje, por ku i dihet do të bënin tattoo numrin e kanotierës së Luizës, e cila për mundin, kushtet e papërshtatshme, të paktën do të respektohej. Pasi kjo mungon, Luiza mirë do të bënte të rrokte një tjetër flamur, ani se ata të grupit “O sa mirë me ken’ shqiptar” do e shanin si Valon Berhamin.
Nejse, uroj t’ia kemi futur kot, sepse ndoshta për Luizën Erioni e ka gjetur një çelës, Lindita Nikolla e ka marrë një email që e ka bërë krenare, Ditmiri e pret për aplikimin e pasaportës diplomatike, kurse kryeministri e ka zgjidhur qesen. Nëpër shesh e lëvizim me pajton, se një është, tek pullë.