Një ndërhyrje e vogël miqësore në bisedën e kryeministrit Rama me Mirën e Chat GPT

Nga Artan Fuga

Unë nuk e ndjek fushatën politike. Jam mërzitur nga politika. Veç persekutime kam parë gjithë jetën prej saj. Por, nga një sy edhe i hedh. Kur kam qejf.

Rastësisht lexova se në një bisedë Mira i kishte thënë z. Rama se tani me inteligjencën artificiale gjëra do të vjetërohen nga mëngjesi në darkë. Duket se kryeministri është impresionuar nga çfarë i ka thënë zonja e nderuar dhe e përcjell me komentin se kjo është e frikshme.

Desha të them se këtu nuk ka asgjë të frikshme.

E para, Mira e ka ekzagjeruar shumë kur ka thënë se me IA gjëra vjetrohen brenda sekondës, ose nga mëngjesi në darkë. Në programim ndoshta, por për t’u shndërruar në fakt dhe proces shoqëror, ka tjetë ritëm kohe. Hane shan hane bagdad!

E dyta, nuk duhet pasur frikë nga ndryshimi dhe nga vjetrimi. Vjetrimi është vetë jeta. Shyqyr që gjërat vjetrohen që të lindë e reja. Pastaj ka vjetrime të mira. Ta zemë vera e vjetër është më e mirë se e reja.

E treta, dhe mbi të gjitha, nuk ka gjë të frikshme, sepse nuk ka në thelb asgjë të re këtu në Univers. Cdo gjë ndryshon në çast, por ne nuk e vemë re.

Mira duhet ta dijë këtë. Edhe një gjethe peme nuk është e njëjtë nga mëngjesi në darkë, as një qime floku, as një qelizë nervore e trurit, asgjë.

Sikur thotë logjicieni Rudolf Karnap në veprën e tij “Ndërtimi logjik i botës”, gjërat ndryshojnë (Herakliti) por ne në logjikë i marrim si përkohësisht të pandryshueshme. Në fakt realisht “identiteti pa ndryshim” është një artific i shqisave dhe i mendjes njerëzore.

Ne kujtojmë se gjërat nuk ndryshojnë shpejt! Është iluzion z. Rama!

Pra, pa frikë të nderuar bashkëqytetarë, pa frikë z. kryeministër!

Mos u trëmbni!

Mira, ndofta e ka ekzgjeruar pak! Jo çdo gjë e di ajo në univers! Sado shumë e nderuar!