Nga Namir Lapardhaja
Shihni me kujdes këtë foto. Nuk është as rastësore, as e publikuar nga SPAK.
Ai përballë është i ngarkuari me punë i Ambasadës së SHBA në Tiranë, David Wisner, i cili kryen detyrimet e institucionit në mungesë të titullarit, tjetri është Altin Dumani, me të njëjtin kostum në çdo dalje publike dhe në një zyrë plot me dosje të përhapura në të gjithë anët.
Foto është atipike, sepse asnjë drejtues institucioni nuk do donte ta nxirrte atë rrëmujë në sytë e medias dhe të publikut.
Tashmë kemi një drejtues të Prokurorisë që nuk e kemi parë më parë, që nuk kujdeset për kurimin e imazhit dhe formalitetin e institucionit, që nuk jep deklarata të drunjta dhe pompoze se në ‘shtator do të ketë arrestime’, që nuk qahet te politika për çështjet që ka në hetim, që bashkëbisedon me gazetarët, duke u dhënë informacione aq sa ia lejon etika dhe ruajtja e hetimit, që e ka bërë të qartë se ‘nuk ka asnjë politikan që mund t’i bjerë telefonit të tij’, madje që me natyrën dhe imazhin e vet ka lënë shumë pa gjumë në Tiranë dhe gjetkë.
Askush nuk e di sot se çfarë është duke tjerr Altin Dumani dhe vartësit e tij brenda mureve të atij institucioni, gjë e rrallë kjo, duke pasur parasysh modelet e kaluara.
SPAK- edhe mund të dështojë dhe të mos qullosë asgjë, por dështimi i tij është lajm shumë i keq për të gjithë shoqërinë shqiptare, ndaj ai duhet mbështetur, drejtuesit dhe prokurorët e tij duhen inkurajuar dhe e gjithë shoqëria jonë duhet të jetë në krah të tyre kundër korrupsionit në nivelet e larta shtetërore dhe krimit të organizuar që vepron dhe që është një rrezik potencial për të gjithë ne.
