GEO-KORCA është një platformë informative gjeografike-turistike e re, unike dhe shumëpërdorimëshe e karakterit udhëzues dhe njohës, e cila u realizua falë një pune të gjatë dhe bashkimit të kontributit e ndihmës të shumë njerëzve.
Ajo është një përmbledhje integrale të dhënash që filloi si përpjekje për të krijuar një udhëzues turistik të rrugëve dhe shtigjeve brenda territorit të Bashkisë Korçë dhe gjatë punës u pasurua me një mori informacionesh të tjera të cilat u gjykuan të vlefshme për t’u vënë në shërbim jo vetëm të turistëve dhe eksploratorëve por edhe të profesionistëve, udhëtarëve, bizneseve, sportistëve, nxënësve e studentëve si edhe kureshtarëve që synojnë të informohen dhe të njohin Korçën dhe rrethinat e saj.
Oferta e kësaj platforme është zgjerimi i këndvështrimit mbi Korçën dhe synimi kryesor i saj është të ndihmojë për ta hapur lojën e turizmit shumë përtej kufijve brenda të cilëve gjendet sot.
Brenda saj do të gjeni shtrirjen e rrjetit rrugor kryesor, rrugëve dytësore e tretësore, do të gjeni 629 km rrugë malore aventure për automjete 4×4, motokros e biçikleta malore si edhe 553 km shtigje këmbësore që i bien kryq e tërthor Moravës, Gramozit, malësive të bukura të Vithkuqit, Voskopojës, Oparit, Prespës, Lenies dhe Mokrës.
Do të shihni vendndodhjet e 950 burimeve dhe çezmave, shtrirjen e rrjetit hidrik të rajonit, gjeologjinë e tij, shpërndarjen e ujërave nëntokësore, tokat, plot 255 pika interesi që do vijojnë të shtohen dita ditës, 299 monumente natyrore dhe 171 monumente kulturore, do të gjeni speciet e florës dhe të faunës, e shumë të tjera.
Aksesi i platformës do të jetë gjithmonë i lirë dhe i pakufizuar.
Informacioni i paraqitur në të shtrihet përtej kufijve të sotëm administrativë të Korçës, deri në Skrapar e Përmet, duke reflektuar atë pellg të gjerë që ka krijuar Korçën e sotme, duke lidhur të gjitha rrugët dhe shtigjet që të sjellin këtu, rrjetin ujor, gjeografinë, potencialin turistik dhe eksplorues të gjithë këtij rajoni që historikisht e natyralisht ka funksionuar si i pandarë duke e parë dhe e bërë këtë qytet kryeqendrën e tij urbane dhe kulturore.
Përdorimi i saj është i thjeshtë duke qenë se jep mundësinë të përzgjedhësh informacionin që dëshiron tek shtresat dhe gjithashtu përzgjedhjen e bazës së hartës në fund të panelit të kontrollit.
Gjithashtu nëpërmjet GPS të smartphone mund të ndiqni rrugën ose shtegun e përzgjedhur dhe të shihni në kohë reale pozicionimin tuaj ne raport me hartën.
Platforma është e hapur e dinamike dhe do të pasurohet vazhdimisht me informacione të reja dhe të përditësuara në varësi të nevojës dhe sugjerimeve të përdoruesve.
Përveç versionit elektronik i cili është më i përdorëshmi dhe që mund ta gjeni duke klikuar https://meet.nextgis.com/resource/302/display?panel=layers, jemi duke prodhuar edhe një sasi të kufizuar në trajtë harte të palosëshme të formatit A0, të cilën do t’ia shpërndajmë bashkisë, operatorëve turistikë dhe njësive të akomodimit. / Nga Ardit Konomi/
