Hermes Beqiri, 23 vjeç, gjeti vdekjen në orët e vona të ditës së djeshme, pasi qëndroi në gjendje të rëndë për jetën për disa orë, në spitalin e traumës në Tiranë.
Menjëherë pas ngjarjes, Policia e Shkodrës arrestoi autorin e dyshuar të vrasjes, shtetasin Elvis Hoxha, 17 vjeç.
Viktima dhe autori kanë qenë duke qëndruar në një lokal në Ish-Zooteknikën në Shkodër, kur mes tyre ka nisur debati për një kapele që ia kanë vënë njëri-tjetrit në kokë.
Kaq është dashur që të rinjtë të konfliktohen.
Pak çaste përpara plagosjes, mësohet se shtetasi Hermes Boriqi e ka rrahur 17-vjeçarin e dyshuar si autor.
Ky i fundit ka shkuar dhe ka marrë një automatik kallashnikov.
Është afruar tek dera e lokalit dhe nga aty e ka qëlluar.
Pas arrestimit, autori i dyshuar është marrë në pyetje mbi ngjarjen e ndodhur në Ish-Zooteknikë.
17-vjeçari, i hutuar nga ana psikologjike nuk ka folur shumë, por vetëm ka treguar se sherri mes tyre ka ardhur për një kapele dhe se 23-vjeçari Hermes Beqiri e ka rrahur.
“Gazeta Shqiptare” ka zbardhur se çfarë deklaroi në polici 17-vjeçari.
“Ne jemi ngatërruar për një kapele.
Nisi pak si lojë, por më pas situata u bë serioze.
Aty ngritëm zërin dhe ai më rrahu.
Më pas kam marrë automatikun dhe e kam qëlluar.
Nuk kam dashur ta vras”, mësohet të ketë thënë 17-vjeçari.
