Presidenti i Republikës ka uruar sot shqiptarët me rastin e Pashkëve Katolike. Në një e-mail shpërndarë për mediat, Bujar Nishani thekson se detyra jonë është për brezat që do vijnë pas nesh.
Presidenti komenton edhe shenjtërimin e Nënë Terezës si shembulll sesi një vend i vogël i jep shumë mbarë globit.
“Kjo ditë e ringjalljes së besimit, i gjen shqiptarët të bindur se hap pas hapi do të shënojmë përparime në rrugëtimin tonë drejt familjes së madhe evropiane” – shkruan Nishani.
Mesazhi i plotë:
“Të dashur besimtarë katolikë!
Me rastin e kremtimit të Festës së Pashkëve, ditës kur të mbarë katolikët ripërtërijnë besimin e tyre tek Biri, Ati dhe Fryma e Shenjtë, dëshiroj t’ju uroj të gjithëve mbarësi, paqe dhe lumturi!
Ju uroj nga zemra në këtë ditë të bekuar që të gjeni e të ripërtërini kurajën, forcën, besimin dhe vullnetin për t’u bërë më të mirë si qenie njerëzore e për të shpalosur vlerat e vërteta të shqiptarizmës!
Festa e Pashkëve, kjo ditë e ringjalljes së besimit, i gjen shqiptarët të bindur se hap pas hapi do të shënojmë përparime në rrugëtimin tonë drejt familjes së madhe evropiane. Ky vit shënon edhe shenjtërimin e bijës më të madhe dhe shembullit mbarëbotëror të mirësisë dhe humanizmit altruist – atë të Nënë Terezës nga Ati i Shenjtë, Papa Françesku I – gjë që do të japë shembullin më dinjitoz dhe më frymëzues se sa vlera dhe dinjitet përfaqëson kombi i vogël shqiptar për mbarë njerëzimin në rrafsh global.
Të gjithë besojnë fort tek mirësia, tek paqja mbi dhé dhe disa prej nesh madje shpresojmë me gjithë shpirt edhe tek bota e përtejme, ku vlerat e vërteta e të qashtra njerëzore gjykohen dhe vlerësohen nga i Plotfuqishmi. Detyra dhe përgjegjësia jonë në këtë jetë është që të përpiqemi me të gjitha forcat dhe mundësitë tona për ta merituar këtë shpresë dhe një jetë sa më të mirë, edhe për brezat që do të vijnë pas nesh.
Gëzuar dhe për shumë vjet Festën e shenjtë të Pashkëve!” – theksohet në mesazhin e Kreut të Shtetit shqiptar.
