Presidenti i Republikës, Bujar Nishani, ka thyer sot akullin lidhur me qëndrimin e kreut të shtetit për Reformën në Drejtësi, pas mbërritjes së opinionit përfundimtar të Komisionit të Venecias. Ai u ka kërkuar sot forcave politike në vend që opinionin përfundimtar për amendimet kushtetuese të Komisionit Venecias ta shikojnë si një ndihmesë “për të vijuar me përkushtim reformën në drejtësi”. Këtë koment kreu i shtetit e ka bërë gjatë një takimi me Sekretarin e Përgjithshëm të Këshillit të Europës Thorbjørn Jagland.
Kreu i Shtetit vlerësoi bashkëpunimin e frytshëm mes Shqipërisë dhe Këshillit të Evropës, veçanërisht në periudhën e fundit të lidhur me reformën në drejtësi, ku Komisioni i Venecias ka dhënë një kontribut shumë të rëndësishëm. ““Opinioni përfundimtar për amendimet kushtetuese do të ndihmojnë klasën politike shqiptare për të vijuar me përkushtim reformën në drejtësi”, ka vlerësuar Presidenti.
