Në konferencën e përbashkët, me presidentin e Republikës, Bujar Nishani, presidenti i KE-së Donald Tusk theksoi rëndësinë e zbatimit të reformave në Shqipëri, në mënyrë që vendi të ecë përpara në drejtim të BE-së. Zoti Tusk inkurajoi palët politike që të gjejnë gjuhën e dialogut.
“I kemi dhënë kurajo Shqipërisë. Eshtë e rëndësishme të theksojmë zbatimin reformave. Eshtë i rëndësishëm dialogu politik mes partive politike. Shqipëria është një partner i besueshëm i BE-së. Jam i bindur se me dëshirën e madhe politike për zbatimin e reformave, Shqipëria do të ketë shumë arritje”, deklaroi presidenti i KE-së.
Gjatë fjalës së tij, Presidenti Bujar Nishani deklaroi se Shqipëria po përmbush kriteret për anëtarësim në Bashkimin Europian. Teksa ka falënderuar për punën Tusk, Nishani theksoi se vendi ynë ka shprehur vullnetin për ndaljen e fluksit të emigrantëve.
“Po përpiqemi të përmbushim betejat e BE dhe plotësojmë kriteret për anëtarësim. E falënderova zotin Tuks për mbështetjen. Në këtë kontekst, i sigurova zotit Tusk se Shqipëria do të vijojë të vazhdojë rrugën e saj të bashkëpunimit në të gjithë rajonit. I kushtuam rëndësi dhe çështjes së emigrantëve. Mogherini, Han, vizituan para pak kohësh Shqipërinë dhe ne i treguam vullnetin që të ndalimin fluksin e emigrantëve”, tha kreu i shtetit.
