Presidenti i Republikës Bujar Nishani ka “shpërthyer” në kritika të ashpra në drejtim të mzhorancës në lidhje me disa çështje që sipas tij janë mjaft shqetësuese për vendin.
Duke folur në pritjen e organizuar për gazetarët, kreu i shtetit deklaroi se institucionit të Presidencës, nuk i është marrë mendim për Reformën në Drejtësi. Kjo sipas tij përbën një sjellje të papranueshme.
“Reforma në Drejtësi që duhet të jetë gjithëpërfshirëse, po zhvillohet pa denjuar të merret edhe mendimi i Presidentit të Republikës. Reforma nuk mund të jetë shprehje vullneti përmes retorikave”, tha Nishani mes të tjerash.
Nishani tha se reforma duhet të prodhojë një produkt për të larguar të korruptuarit. Presidenti veçoi se në fund përgjegjshmëria për dështimiin do të jetë e forcave politike.
“I ftoj të gjitha ata (liderët politikë) të ulen në një tryezë koordinimi për t’u lënë më pas hapësirën ekspertëve që të jetësojnë vullnetin e tyre politik. Shpreh me këtë rast gatishmërinë e institucionit të Presidentit për të dhënë ndihmesën e nevojshme koordinativ mes palëve në këtë problematikë”, tha kreu i shtetit.
Kreu i shtetit kritikoi ashpër edhe sjelljet e mazhorancës me Forcat e Armatosura. Sipas presidentit Nishani, si Komandant i Përgjithshëm i Forcave të Armatosura i janë marrë disa kompetenca padrejtësisht.
“Kompetencat dhe roli i komandantit të përgjithshëm të FA janë minimalizuar në një nivel të papranueshëm”, – tha Nishani.
Në të njëjtën linjë, Nishani foli edhe për çështjet në sistemin diplomatik duke theksuar se është ndërhyrë në kompetencat e tij.
