Presidenti i Republikës Bujar Nishani nuk i ka kursyer as deklaratat politike në një pritje me gazetarët ku ai lakoi të njëjtat akuza si ato të partisë Demokratike, nga e cila u largua pasi mori postin e kreut të shtetit.
Nishani deklaroi se pushteti i katërt përballet me shumë sfida, ndërsa institucionet duhet të gjejnë mënyra për t’i mbështetur. Kurse duke folur për sukseset e vitit 2016, ai e “harroi” reformen në drejtësi, por shtoi se vlerëson si suksese shenjtërimin e Nënë Terezës dhe përfaqësimin e Shqipërisë në Kampionatin Europian të Francës.
Ai foli për mundësinë e përfshirjes së personave të inkriminuar në fushatën për zgjedhjet e ardhshme, akuza këto që bëhen prej kohësh nga Basha e Berisha në drejtim të mazhorancës.
“Grupe të caktuara kriminale do të tentojnë të influencojnë në zgjedhjet e ardhshme parlamentare”, deklaroi Nishani.
Ai më tej i bëri thirrje politikës që të adresojë me shumë kujdes këtë sfidë.
Ai tha para gazetarëve se media duhet të dneoncojë rastet kur krimi influencon në jetën politike.
“Në këtë vit janë zgjedhjet, mundësi për perspektivën në të gjitha fushat, tregues i rëndësishëm për përgjegjësinë dhe maturinë. Standardet e zgjedhjeve janë shumë të rëndësishme për të gjithë, politikën dhe qytetarët, të gjithë pushtetet.
Por duhet të ndaj me ju edhe shqetësimin, pasi ka evidenca serioze që tregojnë se grupe të caktuara të krimit do të tentojnë të influencojnë në zgjedhjet e ardhshme dhe ky problem duhet të na shqetësojë të gjithëve. Politika ta adresojë me shumë kujdes këtë sfidë sepse krimi dhe bota e krimit i prek të gjithë pa përjashtim, ai nuk ka ngjyrim dhe kthehet në një dëm të madh për të gjithë. Prandaj është përgjegjësi shumë e madhe për të adresuar me seriozitet këtë situatë. Media duhet ta denoncojnë këtë proces, nëse bota e krimit influencon në jetën tonë”, deklaroi Nishani.
/a.m.
