Nga Lorenc Vangjel/ Frika për zgjedhjet, sa ankohet opozita
Prej disa ditësh, zonja Audry Glover, kryesuese e minisionit të vëzhgimit të zgjedhjeve, po dëgjon të njëjtin motiv. Ka një shqetësim që i trokitet ditë pas dite në derën e saj për mundësinë e manipulimit të votës. Po të shihen mediat pranë opozitës apo dhe vetë gazeta zyrtare e saj RD, prej ditësh titujt kryesorë të saj kanë të bëjnë me frikën se do të vidhen votat. Sipas tyre, një frikë reale dhe me një skemë reale sesi do të ndodhë.
Kryetari i PD-së Lulzim Basha ju ankua edhe zyrtarisht zonjës Glover për rrezikun e manipulimit të votave. Edhe vetë presidenti i Republikës dha dje një deklaratë me tone patetike për të njëjtin rrezik që shihte sipas tij.”Mos e shisni votën. Vota nuk ka çmim. Shitja e votës është turpi dhe tmerri më i papërfytyrueshëm që na njollos të gjithëve njëlloj. Kandidati që jua blen votën, nuk ju respekton, vetëm ju gënjen, vetëm ju përbuz, vetëm ju urren. Fenomeni i shëmtuar dhe i padenjë i shitblerjes së votës ka ndodhur në disa nga zgjedhjet e kaluara”, thotë duke moralizuar e denoncuar, por në mënyrë të pjesshme zoti Nishani. Sepse ai nuk thotë se cilat janë disa nga zgjedhjet e kaluara dhe nëse në to përfshin dhe ato të organizuara në tetë vjet nga partia që i veshi atij vetë kostumin e Presidentit.
Zonja Topalli, një javë më parë në Parlament bëri dhe një krahasim groteskt për mundësinë e manipulimit të votës dhe për çfarë do të ndodhte të nesërmen në Shqipëri nëse realizohej një skenar i tillë.
Prokuroria shqiptare e ftuar shpesh të ndërhyjë në dyshime të tilla, ka një shans të rrallë të demonstrojë shpejtësi, profesionalizëm dhe objektivitet për t’i dhënë përgjigje sa më të shpejtë çdo denoncimi ngado që vjen. Dje nuk e ka bërë, sot duket se ka vullnet politik të plotë për t’i kërkuar ta bëjë.
E gjithë kjo histori, duket se më shumë se e vërtetë, është një improviziom dhe vënie në skenë me sikur. Ngjan se shumë aktorë kryesorë të opozitës, natyrisht edhe zoti Berisha, më saktë, ai më shumë se të tjerët, kërkojnë të krijojnë klimën e paqëndrueshme parazgjedhore e cila do të justifikonte më pas, çdo rezultat të mundshëm të 21 qershorit.
Të të njëjtës skemë janë dhe sinjalet jo dhe aq të dobta, po nga opozita, të kërkimit të një arsyeje për të bërë të mundur deri dhe bojkotimin e zgjedhjeve, pak para se të mbyllet orari zyrtar i votimit dhe në ditën e votimit. Duke shfrytëzuar hapësira taktike të pamenduara për t’u zgjidhur nga Kodi Zgjedhor.
Ka një precedent të vetëm kjo histori, 26 majin e fiks 19 vjetëve më parë, kur institucioni i zgjedhjeve u vra në Shqipëri duke delegjitimuar në të njëjtën kohë edhe vetë rezultatin e tyre. Në fakt, masakra elektorale e asaj kohe e ka një autor të njohur qartë. Eshtë po ai individ që frymëzon sot frikë se viktimat e djeshme mund të bëjnë atë çfarë ai bëri në mënyrë industriale. Sepse kush bën hile në bixhoz, sheh me dyshim çdo lojtar në tavolinë, kush e ka gënjeshtrën ves, nuk beson askënd çfarë do që t’i thotë, kush është i qeverisur në Shqipëri, si rregull dhe jo si përjashtim, gjykon se ai që e qeveris, nuk mund të bëjë gjë tjetër veçse të manipulojë. Kjo është ironia e fatit! Kjo është dhe çfarë duhet të fitojë nesër edhe pozita, edhe opozita: mundësinë për të pasur zgjedhje të ndershme e të lira, ato që i kanë munguar gjithmonë këtij vendi. Por zgjedhje të ndershme të para me sytë e zonjës Glover dhe jo të gjykimit të zakonshëm deri më tani: të mira për standartet shqiptare.
